Shillong, Risaw 29: Hadien ba ka lympung ‘Shillong Premier League 2025’ ka la poi sha kaba kut mynta baroh ki khmat ki phai sha kawei pat ka lympung kaba thymmai, katta ka Shillong Super Cup 2025, ka ban sa sdang lashai ka sngi Thohdieng bad sngi Saitjaiñ ban wan.
Kane ka lympung ban pynlong da ka Shillong Sports Association, ka plie lad tang ïa ki 6 tylli ki kynhun kiba kynsai tam jong ka SPL ha ka aïom lehkai jong u snem 2025, bad kine ki kynthup ïa ka Langsning kaba la rah ïa ka nam lahduh, ryngkat bad san tylli ki kynhun kiba bud nadien, katta ka Shillong Lajong, Mawlai, Nangkiew Irat, Rangdajied United bad ka Sawmer.
Kane kan dei ka sienjam kaba nyngkong ba ka SSA kan kynthup ïa kane ka lympung ha ka almanak ïalehkai jong ka, da kaba pynlong ïa ka hadien ba la kut ka SPL. Kane ka lympung kan ai biang ïa ka kabu ksiar na ka bynta ki kynhun kiba wan hakhmat ha ka miej kamai point jong ka SPL, ba kin ïakhun biang na ka bynta ka burom lahduh, ha kaba ka rukom ïalehkai la sngewthuh ba kan long beit kaba shi wait ne knock-out.
Namar ba kadei ka lympung tang na ka bynta 6 tylli ki kynhun, ka lahduh jong ka SPL mynta ka aïom ka Langsning FC bad ka Shillong Lajong FC kaba wan ba-ar ki la ap lypa ha ka semifinal. Katba ki saw tylli kiwei pat ki kynhun kin hap ban ïa aireng ha ki ar tylli ki jingïakhun Quarterfinal ba la khreh ban sdang ha kane ka sngi Thohdieng bad ka sngi Saitjaiñ.
Ka Quarterfinal kaba nyngkong kan long hapdeng ka Rangdajied United FC pyrshah ïa ka Nangkiew Irat ha ka sngi Thohdieng, nangta ka Quarterfinal kaba ar kan long hapdeng ka Mawlai pyrshah ïa ka Sawmer ha ka sngi Saitjain. Baroh ar tylli ki jingïakhun kin sdang ha ka por 5 baje janmiet ha madan First Ground-SSA Stadium, Polo.
Haba phai dien, ka Nangkiew Irat bad ka Rangdajied ki la ïakhaid da mar shi kol ha ka jingïakhun jong ki ha ka SPL 2025, katba ka Mawlai SC ka la jop da 6-2 kol ïa ka Sawmer.
Katkum ka prokram, ka semi final la buh ban pynlong ha ka 07 bad 08 tarik Naiwieng, ha kaba ka Langsning kan aireng pyrshah ïa ka nongjop napdeng ka Nangkiew Irat lane ka Rangdajied United, katba ka Shillong Lajong pyrshah ïa ka Mawlai lane ka Sawmer. Katba ka final la buh ba kan long ha ka 13 tarik Naiwieng.
