SHILLONG, Jylliew 20: Ka Shillong Lajong FC kan pynlong ïa ka jingpyrshang jied player khynnah (trial) kiba hapoh 13 snem lashai ka Sngi Saitjaiñ, (22 tarik Jylliew),ban sdang naduh 11 baje mynstep ha SSA Stadium, Polo, Shillong.
Ka rta na bynta ki khynnah kiba lah ban wan sha kane ka trial kan long ïa kito ba kha ha ka 1 tarik Kyllalyngkot 2012 lane shuwa ka 31 tarik Nohprah 2013.
Kane ka long ka lad ïa ki khynnah ban sei madan ïa ka sap kaba u Blei u la bynta bad ka kabu ksiar ban ïoh ïasoh bad kawei na ki klob ba pawnam jong ka thaiñ.
Na ka liang jong ka klob ka la pyntip ba ki khynnah kiba thmu wan sha kane ka Trial ki donkam ban rah ryngkat bad ka Aadhaar Card/Aadhaar Acknowledgement Slip ban pynshisha ïa ka snem jong ki bad ruh ban rah la ki jong ki tiar ïalehkai.
Na bynta ban ïoh jingtip ba kham bñiah ki kmie ki kpa ki lah ban phun ha kine ki number; [9863373299/8413055863].
