Mawkyrwat, Jylliew 03: Hadien khyndai sngi ba la ngam jyllop ha ka Wah Umngi, ki bor synshar shnong jong ka shnong Lawblei, South West Khasi Hills District ha ka sngi Baar ki la ïoh sei ïa kawei ka met ïap ba la suba ba ka lah ban dei jong u Bah Saiñkupar Lyngkhoi, 22 snem.
Ka tyllong khubor ba la ïohlum ka ïathuh ba ïa ka met ba la ïoh ban sei na ka Wah Umngi mynta ka janmiet la suba ba ka lah ban dei ka met jong u Saiñkupar Lyngkhoi ha kaba ki bor shnong jong ka shnong Lawblei ki la lap na kawei ka jaka ba ju khot ka Sdad Keblang, Wah Umngi.
Kum ban shu pyntip, u Bah Saiñkupar Lyngkhoi u la hap bad ngam jyllop ha wah Umngi naduh ka miet 25 tarik, Jymmang, 2025 ha kawei ka jaka ba khot Shar Shar ha shilynter jong ka Wah Umngi katba u dang leit tong doh ha ryngkat ki lai ngut kiba u la ïa leit lang.
Ha ka sngi kaba bud ka kynhun Search and Rescue Teams (SRT) na Shillong bad Fire & Emergency Services (F&ES) na Mawkyrwat ki la pyrshang ban wad hynrei ym shym la seisoh namar ka jingwan tyllep jong ka um saw ba jngut na ka daw ka jingjur shaba palat u slap.
Ha ka 29 tarik, Jymmang, la ïohi ïa ka met jong u ba ka per halor um bad sah kut ha kawei ka kshiad Sympyllieng kaba dei kawei na ki kshaid kaba jrong bad kaba shitom bha ban leit hiar.
Tat haduh ba la da thoh ïa kane ka khubor, ym pat lah ban pynshisha la ka dei neem ka met jong u Saiñkupar Lyngkhoi hynrei la hap ban da ap ïa ka jingpynshisha na ki bahaïing hasem bad na ki bor Pulit jong ka South West Khasi Hills District.
