Nongstoiñ, Naitung, 19: Ka Khasi Students Union Mawshynrut Circle ha ka sngi Balang hapoh ka jinglamkhmat da u General Secretary u samla Ulysis Ryntong ka la hiar jurip ïa ka rukom ai jingshakri jong ka Riangdo CHC, ha kaba ka la shem ïa shibun ki jingduna ha kane ka jaka sumar ka Sorkar kiba ïahap katkum ki jingud jingnam jong ki paidbah ka thaiñ.
Ha u kyrwoh, la pyntip ba ka kynhun ka la hiar jurip ha ka por mynstep bad shem ba kat haduh ka por 10:30 baje ym shym la don satia ki nongtrei ba wan trei hajan baroh ki tnad treikam bad dei tad ka por 11 baje ba ki la ïoh ban ïakynduh ïa u Medical Health Officer.
Ka seng ka la lap ruh ïa shibun ki jingduna ha kane ka jaka sumar ka Sorkar kynthup naduh ki dawai dashin. Kane ka jaka sumar kam don satia wat ïa ki dawai BP, shini, insulin, drip, dawai khunlung bad ki tiar sumar naduh ki gloves, syringe, matress, ki jingthiah bad kiwei kiwei. Ka KSU ka pyntip ruh ba ka jingdon ki nos ruh ka duna sa kumba lai ngut, u chowkidar sa uwei.
Ka KSU ka pyntip ba u M&HO u la kular ba un sa pynïaid ryntih noh ïa kane ka jaka sumar bad ban pynjanai lut ïa ki kam naduh ïa ki nongtrei, ka jingkhuid, ka bam bad ka riam ka beit jong ki Nongtrei baroh.
