Lap ka HITO lyngba ka RTI ba ai Pata bad NOC u Syiem Raid Marwet palat spah ngut ki bar jylla

Shillong, Naitung 31: Ka Seng HITO Ribhoi District ka la leit ban ujor sha u EM ka Elaka, u Bah PN Syiem halor ka jinglap jong ka lyngba ka RTI ba u Syiem ka Raid Marwet naduh u snem 2011 haduh mynta u la ai Pata bad NOC palat spah tylli sha ki bar jylla ba kin shna ïing bad leh ïa kiwei kiwei pat ki jait kam.
Ki nongïalam jong ka Seng ki la ïathuh ba ki la lyngngoh ban ïohi ïa ki bar jylla ba kin ïoh shna ïing shna sem ha ki Shnong kiba hap ha ka Raid Marwet. Hadien ba ki la ïohi kumne, khnang ban lap ïa ka jingshisha ki la pan jingtip lyngba ka RTI na ophis u DC Ri Bhoi District.
Ka Seng ha kae ka jingleit ïakynduh ïa u EM Elaka uba long ruh u Deputy CEM ka KHADC, ka la pynpaw ka jingsngewkhia kaba jur namar kane ka jingleh jong ki Syiem Raid kaba buh jingma shibun eh ïa ka jylla bad kumjuh ruh ïa ki paidbah.
Ka Seng ka la ong ruh ba ka la ïakynduh ruh ïa u Syiem Raid ha kaba u la ïathuh ba napdeng kine kiba la ai NOC ne Pata kidei ki riewlum jong kane ka thaiñ shatei lammihngi kum ki Kuki bad kiwei kiwei, hynrei wat la katta ruh, kane ruh kam long kaba ïahap satia namar ba ka buh jingma ïa ki trai ri trai muluk.
Na ka liang u Bah Pynshngaiñ, u la ong ba un sa peit ïa ki kot ki sla kiba la aiti da ka Seng.