Lap ka FKJGP ba treikam ki Karkhana ha Umïam khlem biang ki kot ki sla

Nongpoh, Ïaiong 25: Ka Federation of Khasi Jaintia and Garo People (FKJGP) North Khasi Hills District mynta ka sngi kala ther tyngeh ïaka District Council bad khamtam ïa u EM Trade halor ka jingkharoi jong ki bar jylla kiba wan trei bylla khlem kot khlem sla bad kumjuh ruh ban seng kam sengjam khlem ki Trading License kiba la shu wan ban trei bad leh mon.
Ka daw bala pynlong ïaka FKJGP ban ther ïaka District Council bad kumjuh ruh u EM Trade ka dei hadien ba naka liang ka seng mynta ka sngi kala leit ban pynlong ka jingkhynra ïaki Trading License bad Labour License haki karkhana haka thaiñ Umiam, bad ha katei ka jingleit khynra naka liang ka seng kala lap ba jan baroh ki karkhana ha katei ka thaiñ kim lah ban pynbiang ïaki kot ki sla naduh ki trading license bad ki labour license ba dei ban ïoh naka District Council kaba la pynlong ïaka seng ban bitar bad khang tala syndon ba kim dei ban plie tad haduh ba kin da lah ban pynbiang ïaki kot ki sla.
Haba kren sha ki lad pathai khubor naka liang u Samla Shanlang Diengdoh General Secretary ka FKJGP North Khasi Hills District haka jingdonlang u Samla Gabriel Sun Education Secretary, Samla Lambha Kurbah Organizing Secretary bad ki dkhot, u la ong ba kum ka seng ka dap da ka jingsngewkhia ban ioh jingtip ba bun naki karkhana ha ka thaiñ Umiam ki dei kiba treikam khlem kot khlem sla kaba la pynlong ïaka seng ban jurip mynta ka sngi bad lap shisha ba kitei ki karkhana kim don kot don sla bad kim lah ruh ban pynbiang ïaki labour license naka bynta ki nongtrei ha kaba kum ka seng kala kynnoh ba ki bar jylla kila pynlong kum ka jaka rieh tngen da kaba wan trei bylla, khlem da don ki kot ki sla bad ka jingpynthikna naki bor shnong bad ki bor pulit, ha kaba kitei ki bar jylla kiba wan trei bylla ki ioh ban leh mon wat ban leh ki kam sniew.
U la ong ruh ba kala don ruh ka jingñiew beiñ da ki manager jong kitei ki karkhana haka liang ka iohkam iohkam ki khasi da kabab uh bun ki bar jylla bad la don katto katne ngut ruh ki longkmie bad ki samla khasi kiba trei ha kitei ki jaka kiba la shah ñion haka rukom treikam tang ba kin phet na katei ka jaka bad ioh ban thep da ki bar jylla haka jaka jong ki, bad kum ka seng kam lah ban pdiang bad kan dang buddien ïa katei ka kam.
Naka liang ka seng ka pynrem jur ïaka District Council bad kumjuh ruh u EM Trade kiba la shu shong tang ha shuki khlem da treikam satia ban pynlong ki jingkhynra lyngba ki pulit Enforcement, kumba kitei ki karkhana mynta kila shu treikam khlem kot khlem sla bad dawa ba ka District Council ka dei ban leit peit bad khmih hi sha katei ka jaka lym kumta naka liang ka seng kan shim pat da kiwei ki sienjam kiba tyngeh.