Shillong, Jymmang 19: Ka BJP kadei ka Seng kaba nyngkong napdeng ki Party kiba don lang ha ka sorkar MDA ban leit jurip ïa ka jingtrei torti ha ka Inter State Bus Terminus(ISBT) ha Mawïong.
Ha kane ka jingleit jurip, ka Seng ka la lap ïa ka jingtrei torti ka PWD Building hapoh ka jingpeit jingkhmih ka tnad Transport bad ka la rai ban ujor sha ka sorkar pdeng bad kumjuh ruh sha ka North Eastern Council (NEC) namar ka pisa ba 48.31 Klur tyngka kadei ba la ai da ka sorkar pdeng lyngba ka NEC.
“Ngin ujor sha ka sorkar pdeng halor kane ka jingtrei torti ïa kane ka Bus Terminus”, Dr. Bernadette Lyngdoh,kaba long ka Chairperson jong ka Central Scheme Monitoring Committee jong ka Seng BJP Meghalaya.
Ha kane ka jingleit jurip ba la ïalam da u Bah AL Hek, MLA ka Seng ha kaba la ïadon lang ruh u Bah David Kharsati, uwei na ki nongïalam ka Party bad kiwei kiwei de ki heh ka Seng, ki la ïoh ban ïakynduh ruh ïa ki nongpynîaid kane ka jaka sangeh bad pynhiar bad thep briew da ki Bus kiba wan na shabar jong ka jylla. Ha kajuh ka por ki la lap ruh da la ki jong ki khmat ïa ka jingtorti ka jingtrei hadien ba ki la jurip bniah ïa ki kamra bad ki jingtrei hapoh kane ka building.
U Bah AL Hek, u la ong ba na ka liang ka Seng hadien ba ladep ban jurip kumne kan sa shong da ka jingïalang ban ïapyrkhat kham bniah kumno ban leh bad kawei na kine hi ka long ban ujor beit sha ka sorkar pdeng, namar kadei ka pisa kaba wan na ka sorkar pdeng.
U Bah David Kharsati, u la ong ba ka ju long hi ka rukom haba trei ïa kano kano ka kam ba la kumno kumno ka jingtrei hapoh ka shi snem kam dei ban don kano kano ka jingthut bad dei ban pynthikna ïa kata haba trei ruh. Hynrei kane ka jingtrei tang hapoh ar bnai kane ka building ka la jaw um bad ka la or pait lut kaba pyni ba ka dei ka jingtrei kaba la shu trei torti, ïa kaba ym lah ban pdiang satia.
