Ka jingdheng kali kab la pynsyrtok ïa ki paidbah nongleit nongwan manla ka sngi ka la kylla long kum ka jingpang kaba ym idon lad shuh ban pynkoit da kumwei pat. Kane ka jingeh kam long tang ha kane ka nongbah Shillong hynrei ka la jia ruh ha ka jylla Meghalaya hi baroh kawei. khamtam ha ki surok National Highway. Ka daw ruh ka dei namar ka jingkharoi ki kali kum ki tit khlaw kaba la buh ïa ki pulit pynïaid kali ha ka jinglynga kumno ban weng ïa kane ka sohsat.
Manla ka sngi, ki paidbah nongleit nongwan ha ki surok kat shaba phai ki ud ki khñium ïa ka jingdheng kali kaba jur. Ki paidbah ki kthang bha haba ki mad ïa kum kine ki jingsyrtok ha ka leit ka wan, khamtam haba ki kylla langkñia ha ka dheng kali da kaba poi slem sha ki jaka trei, sha iew sha hat bad leit jingleit shabar ka jylla bad khamtam eh ïa ki samla pule kiba beh por ban poi sha ki skul bad college.
Ka jing bym lah jong ka sorkar ban law noh ïa ki jyrwit jyrwat jong ka jingdheng kali ha surokbah kaba pynïasoh ïa ka Mawlai sha Shillong, bynta ka Nongthymmai sha Shillong, bad ruh ka bynta jong ka Upper sha Shillong ka ju wan rah jingeh ruh ïa kiba bun ki briew kiba pang ba shitom kiba dei ban leit wad jingsumar. Ka jingpyntreikam ka tnat pynïaid kali da ki Highway Squad ban peitngor ïa ka dheng kali ha surok, ka long tang shikhyllipmat watla ba pli ki pulit pynïaid kali ki pyrshang katba lah la i bor. Ka shong ruh ha ka jingstad ka tnat pynïaid kali ban weng ïa kane ka jingpang kloi lan.
Lada ka sorkar ka angnud shisha ban pynsuk ïa ka leit ka wan u paidbah ka la dei ban shim nuksa na kiwei pat ki jylla na ri thor ban weng ïa ka dheng kali da kaba tei ïa ki fly over khamtam eh ha ka nongbah kaba bun ki lad khnang ba ki kali kiba wan na kawei ka jaka kin ym donkam ban ap laiñ slem slem tang ban ïoh ïaid sha shilliang.
Kawei pat ka lad ka long ba ka sorkar kadei ban pynheh noh ïa ki surok kumba ka ju byrngem namar kam dei satia kaba eh lada ka mon bad leh da ka jingsngewthuh jingmut bad ki trai jaka la ki dei ki riew shimet ne ki jaka jong ka shipai.
Mynta ba ka sorkar ka dang pyrshang ban ïakren bad ka tnad kam ïada ri na ka bynta ban pynphai noh ïa ki jaka puta bym shym pyndonkam da ki shipai sha ka sorkar jylla khnang ba ka sorkar kan ïoh pyndonkam ïaki nak a bynta ka jingmyntoi ki paidbah. Lehse lada ka sorkar jylla ka ïoh ïaki jaka bym shym pyndonkam da ki shipai kan long ka jingïarap kaba khraw baka sorkar kan ïoh ban tei ym tang ïa ki fly over, ki jaka pynieng kali bad wat ka jingpynheh ïa ki surok hapoh kane ka nongbah bad kham sor ruh.
