Katba nangmih ki sngi, la i kumba ki lynti ïaid kjat khamtam na Motphran, GS Road bad Khyndailad ki la nang khap ngiah na ka jingbun jong ki nongshong die madan. Hooid ka dei kaba ym lah ban lait la ka long ha kano kano ka shnong, ka sor ne kano kano ka ri ruh. Hynrei ka jingdon ïa ki aiñ kiba khlaiñ bad ïa ki nongsynshar kiba ïohi jngai ka pynlong ïa ka nongbah ban long kaba ïaid beit ïaid ryntih. Katba hangne ha ka nongbah Shillong pat haba shu peit la i kum ka nongbah ne ka sor ka bym don satia ki nongsynshar. Ki lynti paidbah bad ki jaka ïew ki la jyllei da ki nongdie jingdie bad la shu ïa tur bad phriang katba mon haduh ba la khapngiah lut ka lynti ka synkieng ruh da ki nongdie madan bad ki nongkhaïi beaiñ bad dkhar bad khasi. Naduh na ïewduh shaduh Khyndai lad bad wat kiwei ki jaka ruh katei ka jingïatur bad khnieh wat ïa ki jaka ïaid paidbah ruh ka la jyllei bha ha kine ki sngi katba nangmih na uwei u snem sha uwei u u snem. Ka jingkylli ka long lano keinñ kine ki lynti ïaid kjat kin kylluid bad ki briew kin ïoh ïaid kylluid mynsiem.
Ka ïewduh ka dei kawei ja ki jaka kaba khapngiah tam bad ka daw kam dei ei namar ba la bun ki briew nongleit siew, hynrei ka daw kaba kongsan ka dei namar ba ki bor kiba peit bad synshar ïa ka Iewduh kim lah ban teh lakam ïa ki paidbah nongkhaïi ba ki dei ban die ïa ki mar tang hapoh ki dukan ne ki basa kiba la ai sha ki. Hynrei wat ïa ki lynti ïaid ruh la phiah ha ki ar bynta bad la buh jaka die madan noh hapdeng. Ym tang katta, la mih sa ki nongdie dukan syndon hapdeng ka Surok. Kane ka la wanrah jingeh wat ïa ka Hima Mylliem kaba long ka nongpeit nongri bad nongsumar ïa ka ïewduh. Mynta ka ïakynduh mawsiang, shano yn bret ïa kine ki nongdie madan kiba shong die jingdie syndon hapdeng surok kaba la wanrah ka jingud jingkhnium na ki paidbah bad na ki nongniah kali. Hato ïano yn kynnoh ïa kane, namar kam dei eh ka jingisynei ïa kiba duk kiba rai toi hynrei kawei na ka daw hi ka dei ka jingkangar pisa jong ki bor kiba dei peit ïa ka jingïaid beit ïaid ryntih jong ka ïew. Hooid baroh ngi sngewsynei ïa kiba duk ba rai toi ba kin ïoh ban kamai jakpoh, hynrei ym lah pat ban ïapeiñ ïa ka jingkylluid bad ka jingïaid beit ïaid ryntih jong ka rukom synshar khadar.
Ka Shillong kaba la ïoh ïa ka nam kum ka Scotland jong ka ri Mihngi hynrei kane ka la nanglip rong lip rong katba nangmih ki sngi bad lah ban ong ba mynta lei lei ka la dei pynban kawei na ki jaka kaba lymmuh tam ha kine ki sngi ha ka liang ki ïew ki hat. Ha kine ki sngi ka la long kaba thait bha ban rung shapoh jong ka ïewduh namar ba la pynwit palat ïa ki lynti ïaid baroh da ki nongdie madan bad ka ïew ka la shu khap ngiah bad kam long shuh ka ïew kaba khuid kaba suba. Nalor jong ka jingpynwit jong ki nongdie madan ha ki lynti ïew wat kito kiba don la ka jong ka basa ruh ki ïaleh katba lah ban phriang ïa ki mar jong ki palat ïa u pud u sam jong ka dukan ne ka basa jong ki. Kane ka la nang pynkhap ngiah shuh shuh ïa ka ïew kaba la bna nam jong ka ri Khasi.
Ki paidbah ki ju ud bha ban kiew sha Motphran bad Police Bazar ha ka sngi saitjaiñ namar ba jur palat ka jingkhapngiah na ka jingïaphngian shaba palat ka jingbunbriew kiba wan siew ban tda. Naduh surok, ka jingdheng kali kaba jur, nalor ka jingkhapngiah hapoh ïew ka long shaba palat nalor ïa ki lynti ïaid kjat la shong die madan da ki paidbah. Watla ki bor ba dei peit jong ka Hima Mylliem, ki ïakynduh mawsiang ban pynkylluid ïa ka ïew namar ka jingbym kohnguh jong ki paidbah kiba ju shim kabu ban die jingdie harud surok bad harud lynti ïaid kjat kaba pyndik haduh katta katta ïa ki nongleit nongwan.
Baroh ki lynti ïaid jong ka ïewduh kiba la kham heh kim lait shuh na kane ka jingtur jong ki nongdie madan bad ruh ki nongdie dukan ba phriang ïa ki mar jong ki shabar la ka basa. Ka bor jong ka pisa shisha la la pynduh lut ïa baroh ki jingbit jingbiang jong ki paidbah bad ruh ka jingdon ïa ka ïew kaba khuid bad kaba itynnad jong kane ka ri Khasi.
Ym tang ka ïewduh hynrei wat ki rud surok jong ka surok naduh Motphran shaduh Khyndailad ki la kylla long ki jaka die madan. Ha kine ki sngi ka Motphran ka la long kawei na ki madan ïew luri lura bad ym don aiñ shuh ka ban teh lakam ïa ka jingïaid beit ïaid ryntih. Baroh ki la ïatur beit ban die ïa la ki jong ki mar kiba pher bapher hapdeng surok Motphran. Ki rud jong ka surok naduh rum Motphran ter ter sha Bimola, shaduh them bijoi ki dap da ki poi ei kiba la pynwit ïa ka surok bad pynthut ïa ka leit ka wan jong ki paidbah. bunsien ki paidbah ki hap ban ïaid lang bad ki kali ha surok namar ba ki surok bad lynti ïaid kjat la klun lut da ki khar die madan.
Ka jingailad na ka liang jong ki bor ba dei peit ïa ka bha ka miat jong ka sor ka la pynshlur shibun eh ïa ki briew na ki thaiñ nongkyndong ban wan buhai shnong shapoh sor bad im la ka im kyndoi jakpoh da ki kam khaïi bad die madan. Hynrei kawei kaba i shyrkhei ka long ba kiba bun kiwei pat ki shim kabu bad katba nang bun ki briew kiba lyngkar ka imlang sahlang ka kylla long lyngkar bad shibun ki kam sniew ki lah ban jia. Ka jingbymlah jong ki riew lyngkar ban roi ha ka kamai ka jih ka wanrah shibun ki jingïalam bakla ïa ka jingim jong ki hi poi sa sha ka dih bad khaïi drok ruh.
Lehse ka Dorbar jong ka Hima Mylliem, ka la dei ban pyrkhat noh da kawei pat ka lynti ban pynkylluid ia ka ïew da kaba wad ïa ki lad ki lynti jingïarap pisa khnang ban shna pynbna noh ïa ki Basa kiba don hapoh ïew bad kiba don sawdong sawkun jong ka ïewduh khnang ba ka ïew ym tang ba kan wanrah ka jingkylluid hynrei kan wanrah ruh ïa ka jingkhuid jingsuba khnang ba kane ka ïew kaba ju lehniam manla u snem bad pawnam naduh ka por u menbarim kan ïoh biang ïa ka nam ba ka don. Kumjuh ruh ki bor synshar district bad sor ruh ki dei ban pynsted noh ban thaw ïa ki jaka ban pynkynriah ïa kine kiba shong die madan khnang ban kylluid noh ki lynti ïaid kjat.
