Ahmedabad, Jylliew 12 : Uwei u rangbah na ka Ahmedabad, u Savjibhai Timbadia u la bteng ban ainguh ïa u Blei namar u la lait ei na ka jingïap tang na ka daw ba u la rai ban ym pat leit da katei ka liengsuin Air India na Ahmedabad ban leit sha London ha kane ka sngi Palei.
“Nga sngewsnguh ïa u Blei kiba la pyllait ïanga na ka jingïap,” ong u Timbadia haba kren bad ki lad pathai khubor.
“U khun jongnga u sah ha London bad dang shen u la thied tiket na ka bynta jongnga ba ngan wan da kane ka liengsuin bad la mang ruh ia ka jaka shong (seat number) na bynta jongnga. Hynrei nga buhteng shwa ban leit da saw sngi,” u la bynrap shuh shuh.
Nangta u ong ruh ba um poi pyrkhat ba kane ka rai ba u shim kan pyllait ïa u na ka jingiap. “Hadien kane ka jinghap bad ka jingbthei jong ka liengsuin u khun u la phone ïanga na London bad ong ba ki kam ba bha ba nga leh ha kane ka pyrthei ka la pynlong ïa ki blei ban ïada ïa ka jingim jongnga.”
Lah ban kdew hangne ba ka liengsuin Air India kaba kit haduh 242 ngut ki nongshong ka la hap bad bthei noh ha ka ka medical college complex ha Ahmedabad tang khyndiat minit ba ka mih na ka kad liengsuin kaba don hangtei hi kaba la wanrah ïa ka jingïam briew kaba khraw. Napdeng kine, u Myntri Rangbah barim ka Gujarat u Vijay Rupani ruh u la ngat lang ha kane ka jingjia ba sngewsih.
