Shillong, Naiwieng 20: Laingut ki briew ki la lait im da ka jingïarap lang ka State Disaster Response Force (SDRF) bad ka Fire & Emergency Services (F&ES) halor ka jingjia twa khyndew kaba la jia ha ka step jong ka sngi Palei ha Tura, ka shnong Danakgre katba uwei pat u nongbylla u la khlad noh ha Hospital ha kane ka jingjia twa khyndew.
Kane ka la jia hadien ba 5 ngut ki nongbylla kiba dang tih nongrim ban tei ïa ka kynroh ki la kylla long lanot ha kaba kynsan kynsan ka khyndew kaba nalor ka la twa bad khyllem halor jong ki, kaba la tyllep ïa ki.
Katkum ka jingïathuh u Peniwel T Sangma, Divisional Commandant ka Home Guards, Tura Home Guards Division, kane ka jingleit ïarap ka SDRF ka la sdang naduh ka por 9.30 baje mynstep hadien ba u la ïohpdiang ka jingshah phone na ki bor pynïaid District shaphang kane ka jingjia. Ka SDRF da ka jingïatreilang bad ka Fire & Emergency Services ki la lah ban pynlait ïa 3 ngut ki nongbylla bad ban sei pat ïa ka met uwei u nongbylla.
Katba ïa uwei pat u nongbylla la rah noh sha hospital da kiwei pat ki para nongbylla ha shwa ba ka kynhun SDRF bad F&ES kin poi ha ka jaka. Kham hadien pat la ïoh jingtip ba u la khladnoh na ka daw ka jingmynsaw ha Tura Civil Hospital.
