Nongstoiñ, Nailar, 23: Ki nongrep ki la nang shah khñiot bad shah ñion haduh ba ki la hap ban shu kyrngah khlieh namar ka jinghiar dor jong ki mar rep jong ki, ka la long shaba palat. Ki nongrep kiba la shah ktah palat ha kine ki sngi, ki dei ki nongrep biskot namar ka dor ha kine ki sngi ka la hiar sha ka lai tyngka shi kilo.
Ka kong B.Marngar kawei na ki nongrep biskot ka thaiñ Marngor ka la ïathuh ba ka jingrep biskot mynta u snem kam long shuh kum ha kiwei ki snem. Ka la ong ruh ba mynta u snem u biskot um da soh bha bad u jyntang ruh u suki bha ban san. Wat la katta ruh ha u bnai jylliew haba dang sdang ban ïoh kheit malu mala, ka dor biskot ka dor ka poi arphew hynriew haduh arphew phra tyngka shi kilo, hynrei ka nang hiar pat man la ka taïew bad ha kine ki sngi ka la hiar sha ka lai tyngka shi kilo.
Ha kajuh ka por ka la ong ba ha kine ki sngi u biskot u la sdang ban soh bha, hynrei haba ka dor kam long shuh ban die kam don jingmut shuh hynrei satang ban ai bam sniang lada dei kiba ri sniang.
Kiwei pat ki nongrep biskot kylleng ki shnong katei ka thaiñ ki la pynkynmaw ba ha u snem ba la dep ,u bah Banteidor Lyngdoh haba kren ha ka jingïalang ba la khot da ki nongrep ha Nongkasen, u la kular ban thaw lad ba ki nongrep biskot kin ïoh ban shalan biskot sha ki ïew ki hat sha Bangladesh bad ka la pynkmen ïa ki paitbah nongrep, hynrei haduh mynta um pat lah ban pynurlong.
Ha kajuh ka por ki la ong ba dang ha kine ki sngi ki la ïohi lyngba ki lad pathai khubor, ba u bah Banteidor u la ïaroh ïa ka sorkar ba ka la shah biang ba ki nongrep kin pyndonkam dawai sboh urea, DAP bad kwei kiwei na ka bynta ban pynbha ïa ka rep ka riang, ha kaba ki la ong ba kan myntoi aïu lada ka rep ka riang kan bha hynrei ïa ki mar rep kum u phan, u biskot, sohsaw, ki jhur ki jhep kiba dei ki mar rep kiba pyut tang hadien katto kat ne sngi. Ki la ong ruh ba kaba donkam eh ka dei ka ïew namar lada ka biang ka ïew ka hat, ki nongrep ruh ki trei shitom hynrei lada ka ïew kam don ki nongrep ki hap ban rep tang ban ïoh bam.
