Lai bnai kynthih pynsngewthuh ka MACS halor ka jingpang HIV/AIDS ha East Jaiñtia Hills

Khliehrïat, Nailur, 10: Ka jingpynsngewthuh paidbah kaba lai bnai kynthih halor ka jingpang HIV/AIDS da ka Meghalaya AIDS Control Society (MACS) ka la poi noh sha kaba kut ha ka sngi Saitjaiñ ha ryngkat ka jingïatreilang bad ki bor synshar jong ka East Jaiñtia Hills District bad ka ophis jong u District Medical & Health Officer (DM&HO) East Jaiñtia Hills District bad kiwei kiwei ki tnat.
Ha ka jingpynkut ïa kane ka jingpynshai paidbah la sakhi lang da u Myntri ka Sorkar Jylla u Bah Kyrmen Shylla uba long ruh u MLA jong ka Khliehriat Constituency uba la long kum u Kongsan, u Chairman jong ka Meghalaya State Health Advisory Board u Bah Mayralborn Syiem, u Addl. Deputy Commissioner ka East Jaiñtia Hills District u Bah Gautam Warjri, u District Medical & Health Officer u Dr. Dominic Shylla, u Dr. B. Decruse, u Project Director jong ka MACS bad u Dr. L. Myrthong, Deputy Director (Medical) MACH.
Haba kren ha ka jingïalang u Bah Kyrmen Shylla, u la ong ba kane ka jingpynshai paidbah ka long kaba seisoh dei lyngba ka jingïatreilang namarba ha kane ka pyrthei kaba mynta ki don shibun ki jingeh ha kaba ïadei bad ka koit ka khiah ha kaba donkam ban wad ki lad ki lynti ban long kiba koit ba khiah.
U la ong ba ka jingpynshai paidbah halor ka koit ka khiah ka dei kaba donkam bha bad donkam ruh ban don ka jingïatreilang bad kiwei kiwei ki lad ai jingsumar, dei ban don ki nongshna polisi, ki nong wad bnïah bad donkam ruh ïa ki paidbah nongshong shnong bad donkam ruh ban kyntiew ïa ka koit ka khiah jong ki nongshong shnong.
U la ai ruh ka jingïaroh ïa ka Meghalaya Aids Control Society kaba la lamkhmat ha kane ka jingpynshai paidbah ïa ka koit ka khiah ha East Jaiñtia Hills District da ka jingïatreilang bad ki bor synshar distrik kumjuh ruh ka ophis jong u District Medical Health Officer ka East Jaiñtia Hills District lem bad kiwei kiwei ki tnat.
U Bah Mayralborn Syiem haba kren jingkren u la ong ba ka long kaba donkam bha ban ïatreilang ban pynkhlaiñ ïa ka jingïalap paidbah shaphang ka jingdonkam ka koit ka khiah khamtam ha kaba ïadei bad ka jingpang HIV/AIDS ha ka imlang ka sahlang.
U la kyntu ruh ba donkam ban pynlong ïa kane ka jingpynshai paidbah sha kiwei kiwei ki distrik da kaba kyntu ïa u Project Director jong ka Meghalaya Aids Control Society (MACS) ban pynlong ïa kane ka jingpynshai paidbah ha Ri-Bhoi District.
Ha kaba ïadei bad ka jingpang HIV/AIDS, u la ong ba ki jingpynshai paidbah ki dei kiba donkam bha ba ki paidbah kin sngewthuh bad lyngba ka jingïatreilang yn sa lah ban kyntiew ïa ka koit ka khiah bad ban kyrshan ïa kito kiba la ioh ïa ka jingpang HIV bad ruh ban ïaleh ban tehlakam ïa ka jingsaphriang ka jingpang HIV.
Haba kren shaphang ka jingkynrei jong u drok, u Bah Mayralborn Syiem uba long ruh u MLA jong ka Nongpoh Constituency u la pynpaw ka jingsngewkhïa namar ka jingkiew stet shaba palat ka jingkhaiï drok bad u la kyntu ïa ki khun samla ba ki dei ban kiar na u drok. U la pynshlur ba ki dei ban ïashim bynta ha ki kam bapher bapher ki ban kyntiew ïa ka imlang ka sahlang ha kaba ki nongmihkhmat pat kin leh ïa kaba bha ban pyntreikam ïa ki polisi ban kyntiew ïa ki lad iohkam iohjam jong ki samla
U Dr. B. Decruse, uba dei u Project Director jong ka MACS, u la batai bad pynshai halor kane ka Health Campaign kaba la dep pynlong lai bnai kynthih ha East Jaiñtia Hills District.
Kiwei pat kiba la ai jingkren ki kynthup ruh u Bah G. Warjri, u Dr. Dominic Shylla bad u Dr.A.M Lanong uba dei u Deputy Director Mainstreaming jong ka MACS.
Ha kane ka sngi, u Bah Kyrmen Shylla bad u Bah Mayralborn Syiem ki la pyllait paidbah ïa ka kali Mobile ICTC Van bad u Dr. L. Myrthong u la pynsmai ïa kiba don lang ha ka jingïalang ban tehlakam ïa ka jingsaphriang ka jingpang HIV/AIDS kumjuh ruh ban hikai ba ym dei bad peit beiñ ne peit poh ïa kiba pang HIV.
La sam ruh ïa ki khusnam sha ki kynhuh bapher bapher jong ka tnat ka Koit ka Khiah, sha ki NGO kiba ai ka jingïatreilang kiba kynthup ka TLS, SETU, 1 LT, SURE, SACS, Bansara Eye Care, Nethralaya, National Institute of Paramedical Technology, sha ki College, sha ka tnat District Social Welfare, ka tnat treikam jong ka Block Development Officer, MHIS, ki Waheh Shnong, ka Kyrmen Foundation bad sha ki karkhana dewbilat bad sha ka DISHA Khliehriat lem bad ïa ki doktor.