Shillong, Naiwieng 10 : Ka jingïoh jong u samla Steve Jyrwa ban khur ïa ka khusnam lahduh jong ka India’s Best Dancer Season 4, ka la rah biang ïa ka burom jong ka jylla Meghalaya ban pynpaw ïa ka sap ba ki khun samla ki don ym tang ha ka rwai ka siaw, ka put ka tem hynrei ruh wat ha ka jingtbit ban shad.
Dang ha ki khyndiat snem ba la dep, ka Meghalaya ka la ïoh ruh ban sei ïa u Amit Paul uba la wan ha ka kyrdan kaba ar, hadien pat sa ka Shillong Chamber Choir kaba la ïoh ban khur syndon ïa ka nam lahduh ha ka India Got Talent. “Hynrei mynta pat ngi la ïoh sa u samla Steve ban rah ïa ka burom jong ka jylla,” ong u President jong ka All Meghalaya Dancer’s Association, Bah Kitbok Thabah ka kynhun kaba la trei borbah na ka bynta u samla Steve ryngkat bad ki bahaiing haduh ba un da poi sha katei ka thong.
“Ngi dap da ka jingkmen kaba khraw ban ïohi ba u Steve u la ïoh ban khur ïa ka khusnam lahduh bad kylla long ruh u samla ba nyngkong eh na ka association ban khur ïa katei ka nam kaba burom kaba khraw,” u la ong.
Ha kajuh ka por u ong ruh ba kane kadei ka sngi kaba khraw tam na ka bynta ki nongshad ha ka jylla baroh kawei namar kadei ka sien kaba nyngkong eh ba kin sakhi ba u dkhot jong ki un ïoh ban mih madan ha ka lympung kaba heh tam ha ka ri bad ban khur syndon ïa ka nam lahduh.
Une u samla u ioh khur ia ka song pisa kaba 15lak tyngka ryngkat ka kali nalor ka khusnam kyrpang.
