Shillong, Risaw 10: Ka kynhun ki nongïakop jngi jong ka True North ka la wan hakhmatduh ha ka jingïoh khur bun takma ha kane ka State Aquatic Championship kaba 16 ba la pynlong da ka Meghalaya Swimming Association (MSA) ha Crinoline Swimming Pool, Shillong haka sngi Saitjain jong ka taiew bala dep.
Ha kane ka kynti ba mynta ki nongïakop jngi kiba la wan ban shimbynta ki long haduh 116 ngut, kata kynthei ki don- 29 ngut bad ki Shynrang – 87 ngut kiba la kynthuplang nangne na nongbah Shillong, Umpung, Shylla bad Mawkyrwat, ryngkat bad kiwei ki jaka.
Ki nongïakop jngi jong ka kynhun True North ki la lah ïoh ban khur haduh 26 tylli ki takma ksiar, 21 tylli ka rupa bad 6 tylli ka rnong, kaba la pynskhem ïa ka kynhun ban ïeng ha ka kyrdan ba nyngkong.
Ka kynhun kaba la wan ha ka kyrdan ba ar, ki dei ki nongïakop jngi na Shella, kaba la khur 14 tylli ki takma ksiar, 12 tylli ki rupa bad 8 tylli ki rnong. Ki nongïakop kiba mihkhmat ïa ka Mawkyrwat, ki la khur 8 tylli ki takma ksiar, 14 tylli ka rupa bad 12 tylli ka rnong. Katba na ka liang jong ka Umpung, ka la ïoh khur kawei ka takma ksiar, 2 tylli ki rupa bad 2 tylli ka rnong. Kiwei pat kiba la shimbynta ha kane ka ïakop jngi ki la ïoh khur 8 tylli ka takma ksiar, 8 tylli rupa bad 12 tylli ka takma rnong.
