Shillong, Jymmang 20: Ka St. Anthony’s Higher Secondary School ka ïohrah ïa ka nam lahduh ha ka East Khasi Hills District Level Inter School Athletic Meet 2022, ka Loreto Convent ka jop kyrdan ba ar, ka St. Mary’s Higher Secondary School ha ka kyrdan ba lai bad ka Seven Huts H/S School ha ka kyrdan ba saw.
Kane ka lympung kaba la sdang ha ka 18 tarik ka la poi noh sha kaba kut ha ka sngi Thohdieng (20-5-2022) ha SAI, STC Shillong.
Ka St. Anthony’s Higher Secondary School ka ïoh khur 23 tylli ki takma, 9 tylli ki takma ksiar, 7 tylli ki takma rupa bad 7 tylli ki takma rnong. Ka Loreto Convent, Shillong ka khur 11 tylli 3 tylli ki takma ksiar, 4 ki takma rupa bad 4 ki takma rnong.
Ka St. Mary’s Higher Secondary School kaba wan ba lai ka khur 10 tylli kynthup ïa 8 tylli ki takma ksiar bad mar iwei ka takma rupa bad rnong, katba ka Seven Huts Higher Secondary School kaba wan kyrdan ba saw ka khur 4 tylli 3 tylli ki takma ksiar bad 1 takma rnong.
Kiba la ïoh ïa ka nam Best Athlete ha ka Under -14 jong ki kynthei ki long ka Shiksha Pradhan jong ka Loreto Convent, Shillong katba ha ka liang ki shynrang la ïoh da u Jonathan Thangkhiew jong ka Seven Huts Higher Secondary School.
Ha ka Under-16 jong ki kynthei ïa ka Best Athlete la ïoh da ka Chitra Malik jong ka St Mary’s HR Secondary School, ha ka liang ki shynrang la ïoh da u Embhahlang Lyngdoh jong ka St. Anthony’s Higher Secondary School.
Katba ha ka kyrdan Under – 18 ka Bethlyne G Makri jong ka St Mary’s Higher Secondary School ka la ïoh ïa ka nam Best Athlete bad ha ka liang ki shynrang la ïoh da u Donbok Shabong jong ka Shillong College.
