Lahduh ka Shiparalok-Jingïaseng Kynthei Mairang Presbytery ïa ka Futsal ka JK KJP Synod Sepngi

Shillong, Nailar 27 : Ka Shiparalok jong ka Jingïaseng Kynthei Mairang Presbytery ka la long ka lahduh ha ka lympung ïalehkai Futsal ba la pynlong da ka Jingïaseng Kynthei Khasi Jaiñtia Presbyterian Synod Sepngi da kaba pynliem ïa ka Jingïaseng Kynthei Rambrai Presbytery.
Ka Shiparalok Jingïaseng Kynthei Mairang Presbytery ka la pynliem da 6-2 kol ïa ka Jingïaseng Kynthei Rambrai Presbytery ha ka jingïakhun final kaba itynnad bha ha ka sngi Saitjaiñ ha madan Student, Jaïaw.
Ka Shiparalok-Jingïaseng Kynthei Mairang Presbytery kaba long ka lahduh ka la khur ïa ka song pisa kaba 35,000 tyngka katba ka ryngkat ka trophy katba ka Jingïaseng Kynthei Rambrai Presbytery ka ïoh 15,000 tyngka ryngkat ka trophy.
Ka Jingïaseng Kynthei KJP Synod Sepngi ka la pynlong ïa katei ka lympung ïalehkai kaba lai sngi ha ryngkat ka jingïatreilang ryngkat ka Mawkhar SC da kaba pynïalehkai ïa ki Presbytery kiba hap hapoh ka jingpeit jingkhmih jong ka KJP Synod Sepngi ka long shi bynta ban pynmih pisa ïa ki project kiba bun kiba kum ka JK KJP Synod Sepngi ka don.
Ha katei ka jingïalehkai final la wan ban sakhi lang u MP ka Shillong u Bah Vincent H Pala uba la long kum u kongsan bad u President ka Mawkhar SC Bah Ransom Sutnga kum u symbud kongsan.
Lyngba ka jingpynlong ïa katei ka tournament, ka pisa ba ïoh lum ka Jingïaseng Kynthei KJP Synod Sepngi kan pyntreikam na bynta ka counselling centre ha Shillong, bad na bynta ka skul ha Umsaitjaiñ bad ka kam misson ha ka jylla Assam.
Ha katei ka tournament ba lai sngi la wan ban ïashim bynta da 32 tylli ki team kaba la sdang ha ka sngi Palei ïa kaba la plie pyrda da u MLA ka North Shillong MLA u Bah Adelbert Nongrum.
Haba ai jingkren ha katei ka sngi, u Bah Ransom Sutnga u la ong ba ka Mawkhar SC kaba mih madan ha ka lympung Shillong Premier League ka la shoh jingmut ïa ki nongïalehkai kiba la pynpaw ïa la ki jong ki sap ha katei ka tournament. U la ïaroh ruh ïa ki nongpynïaid kiba la trei shitom bad kumjuh ruh ïa ki 32 tylli ki team bad ai mynsiem ïa ki nongïalehkai ba kin dang bteng ban ïalehkai bha ha kiwei pat ki jingïalehkai. U Bah Ransom u la kular ruh ba un dang ïai bteng ban ai ka jingkyrshan ïa ka Jingïaseng Kynthei KJP Synod Sepngi bad ïa kino kino ki prokram ba ka pynlong ha ki sngi ban wan.
U Bah Vincent H Pala haba kren kum u kongsan u la ai khublei ïa ka Jingïaseng Kynthei KJP Synod Sepngi kaba la trei ki kam ba bha bad ong ruh ba ka jingkilan met ka long kaba donkam da kaba bynrap ruh ba kiba kum kitei ki jait jingïalehkai ki long kiba ai jingmyntoi shibun khamtam na bynta ki khun samla ba kin lait na kiba bun ki jingsniew khamtam na u drok.
Na ka liang ka Jingïaseng Kynthei KJP Synod Sepngi ka pynpaw ka jingai khublei ïa kitei ki arngut ki rangbah kiba la wan ban donlang ha ka jingïalehkai final, kumju ruh ki pastor, ki tymmenbasan bad ki riew rangbah. Ka ai khublei ruh ïa u Bah Ransom Sutnga bad u MLA ka Mawlai Bah PT Sawkmie kiba la ïarap na bynta ka khusnam song pisa na bynta ka lahduh bad kaba wan ba ar.