Jowai, Nailar 17: Ka lympung ïalehkai phutbol Independence Day Cup Under-17 Football Tournament 2022 ba la pynïaid da ka West Jaiñtia District Sports Association (WJDSA), kala poi noh sha kaba kut ha ka jingïakhun Phainal hynnin ka sngi 15 tarik ha madan Kiang Nangbah Stadium, Jowai kaba dei ka sngi ïoh laidluid ba 75 snem ka ka Ri India.
Haba phai sha ka jingïakhun Phainal hapeng ki ar kynhun kita ka Luti Tuber Ialong bad ka Sailung Ialong kala long kaba itynnad bad kaba ïakhaid bha namar ka jingïakhun jong ki haduh ka por ba la buh ym shem la don satia kiba ïoh ban thep kol.
Ïa jingïakhun Phainal la hap ban pynïaleh noh da ka jingïashut ‘Tie Breaker’ ha kaba ka kynhun jong ka Sailung Ialong kala lah ban pynliem da 5-4 kol ïa ka Luti Tuber Ialong.
Ha kane ka sngi pynkut u MLA ka thaiñ ma Wailadmiki Shylla ula long kum u kongsan ha rynkat ka jingdonlang u Synbud kongsan u Deputy Commissioner West Jaiñtia Hills District bah Garod L.S.N. Dykes, IAS nalor ki nongïalam ka WJDSA bad kiwei de.
La sam ruh ïa ka khusnam sha ki nongjop ïa ka Man of the Match kaba la leit sha u Seiborlangki o Rymbai na ka Sailung Ialong, Best Goalkeeper la ïoh da u Heimonmitre Shylla ka Luti tuber Ialong, Top Scorer la ïoh da u Banshanbor Pale ka Sailung Ialong uba la thep haduh 9 kol, katba ïa ka nam Player of the Tournament la ïoh da u Iohbhah Dhar jong ka Luti Tuber Ialong.
Lyngba kane ka nam jop jong ka Sailung Ialong na ka liang u Hony. General Secretary ka WJDSA ma Lammat-oo Laloo u pynpaw ba ka Association ka kitbok kitrwiang ïa kane ka kynhun kaba long kum ka lahduh ha kane ka lympung Independent Day Cup U- 17 ha ka sien ba nyngkong, Kane ka kynhun kan ïoh ban leit ïashim bynta ïa ka WJDSA ha ka Under-17 Football League Tournament kyrmen ba kan jop naduh ka District Level, ka State Level bad haduh ban da poi ha ka National Level.
