Mawkyrwat, Ïaïong 26: Ka Nativity Higher Secondary School, Mawkyrwat ka la long ka lahduh ha ka lympung ïalehkai jong ka 11th South West Khasi Hills District Level Inter School Athletics Meet 2025 (SWKJDL-ISAM) ba la pynlong ha Rowell Lyngdoh Stadium, Mawlangwir, South West Khasi Hills District.
Lah ban kdew ba ka jingrah jong ka Nativity Higher Secondary School, Mawkyrwat ïa ka nam lahduh ka dei ruh ha ka sien kaba 7 (hynñiew) haba mynta ka kynti ka la ïoh haduh 18 tylli ki takma ksiar, 13 ki takma rupa bad 11 ki takma rnong. Ha ka March Pass pat la rah ïa ka nam lahduh da ka Little Star Higher Secondary School, Mawkyrwat.
Ha kane ka sngi la sam ruh ïa ki khusam shimet kata Best Athletes kiba hapoh 14 snem ki long u Jerrydonal Marweiñ jong ka Nativity HSSM bad ka Daphiwansara Lyngkhoi jong ka Nine Set SS, kiba hapoh 16 snem ki long u Khlurshai Iawphniaw jong ka Little Star HSS bad ka Ibandariakor Nongsiej jong ka Nativity HSSM katba kiba hapoh ka 18 snem ki long u Luckyson Lyngdoh jong ka Sngap Syiem College, Mawkyrwat bad ka Latympang Lyngdoh jong ka Nativity HSSM.
Ïa kane ka lympung la pynïaid da ka ophis jong u District Sports Officer (DSO) ka South West Khasi Hills District ryngkat ka jingïatreilang bad ka South West Khasi Hills Athletis Association (SWKHAA) ha kaba u kongsan ha kane ka sngi u dei u bah D.P. Muktieh uba dei u Executive Engineer jong ka ophis Water Resource, South West Khasi Hills District kum u kongsan.
Lah ban kdew ba ha kane ka lympung ïalehkai jong ki khynnah skul la sdang naduh ka 23 bad la pynkut mynta ka sngi ka 25 tarik u Ïaïong, 2025 ha kaba ki don baroh 36 tylli ki skul bad 670 ngut ki khynnah kiba ïashimbynta ha ki jait jingïalehkai bapher bapher katba ha ka March Pass pat ki don baroh 11 tylli ki skul.
Kiwei de kiba ïa donlang ki kynthup ïa u bah Damang Syngkon, District Sports Officer ka South West Khasi Hills District, u bah B. Kharjana, MPS, Additional Superintendent jong ki Pulit ka South West Khasi Hills District, u bah L.T. Tariang, MCS, Additional Deputy Commissioner, South West Khasi Hills District lem bad kiwei de kynthup ïa ki nonghikai bad ki khynnah skul.
