Shillong, Rymphang 16: Ki ar tylli ki jingïakhun final jong ka Shillong Cricket League 2024-25 ha ka kyrdan Second bad Third Division ba la pynïaid da ka Shillong Cricket Association ha madan Urkaliar, Shillong ki la poi sha kaba kut ha kaba ka Lawsohtun bad ka Sanmer ki la long ki nongjop.
Baroh ar tylli ki kynhun kiba rah nam lahduh ki la jop hadien ba tied nyngkong, ha kaba ka Lawsohtun ka la lah ban pynliem da 84 ron ïa ka NWCC ban rah ïa ka Second Division, katba ka Sanmer CC ka la jop da 34 ron ïa ka Lagaan 2.0 ban rah ïa ka Third Division.
Ha kane ka sngi la wan Kongsan da u Bah Samborlang Diengdoh, u rangbah ba ju kyrshan ha ka ban kyntiew ïa ka kam ïalehkai, ha ka jingïadonlang u Dhurba Thakuria – Treasurer jong ka MCA kum u Symbud kongsan.
Ka jingïakhun final kaba nyngkong ka la long ha ka 3rd Division, ha kaba ka Sanmer ka la rai ban tied nyngkong bad kamai 147 ron haduh kaba kut jong ka 20 ober bad khyllem 7 wiket. Kiba la kamai bun ron ïa ka kynhun ki long u Kirin (64 ron naki 50 bol) bad u Eugine Shanpru (29 ron naki 23 bol). U Gautam Kumar u la khur 3/21 naki 3 ober.
Haba wanphai ban tied u Sameer Dhanraj u la kamai 39 ron naki 24 bol hynrei ka Lagaan 2.0 kam shym la lah satia ban poi sha ka thong naba khyllem lut baroh 10 wiket tang na bynta 123 ron naki 18.4 ober.
U Hubert Shanpru u la khur 2/22 naki 4 ober, hynrei ka jingïaroh ka long sha u Kirin, hadien ba u la kamai 64 ron ha ka tied u la ïoh ruh ban khur 3/17 naki 4 ober ha ka bol ha kaba u la ïoh ïa ka nam Man of The Match.
Haba phai sha ka final jong ka 2nd Division, ka toss la jop da ka Lawsohtun kaba la rai ban tied nyngkong ha kaba ka la lah ban kamai 165 ron haduh kaba kut jong ka 20 ober bad khyllem 8 wiket. U Hilarious Thabah u la duna khyndiat ban kynjoh ïa ka spah ron da kaba thlieh 95 ron naki 45 bol, katba u Peter Lyngkhoi u la kamai 18 ron naki 12 bol. Napdeng ki rangkawang bol jong ka NWCC u Lakhan Lal Das u la khur 2/15 naki 4 ober, katba u Prasenjit Chanda u la khur 2/18 naki 4 ober.
Haba pyrshang beh ïa ka thong ka NWCC ka la shah pynkut noh da tang 81 ron naba khyllem lut baroh 10 wiket naki 14.1 ober, dei tang Sanjiv Ghosh (18 ron naki 12 bol) bad u Anupam Paul (15 ron naki 14 bol) kiba kham seisoh ha ka tied.
Ki rangkawang bol kiba pawkhmat na ka Lawsohtun ki long u Nick Lyngdoh uba la khur 3/16 naki 3 ober bad u Greatestful Lyngkhoi uba la khur 2/5 naki 3 ober. ïa ka khusnam Man of The Match la khur da u Hilarious Thabah uba la kamai 95 ron.
