Shillong, Nailur 22 : Ka San Shnong Youth Welfare Organization (SSYWO) ha ka sngi Palei ka la ïoh ban pynkut noh ïa ka lympung ïalehkai phutbol jong ki skul kaba la tip kum ka 1st SSYWO Free Inter School Knock Out Football Tournament 2022 ha madan phutbol jong ka shnong Marbañiang Umseiñïong.
Ha katei ka lympung ïa ka nam lahduh ha ka liang ki shynrang jong ki senior la ïoh rah da ka Kyntiew Shaphrang Higher Secondary School, Laitlyngkot, ka Pomlum Higher Secondary School, Baniun ha ka liang ki kynthei katba ka St. Paul’s Higher Secondary School, Marbisu ha ka kyrdan ki junior ki shynrang.
Ka Kyntiew Shaphrang HSS, Laitlyngkot ka la pynliem ïa ka Pomlum HSS, Baniun lyngba ka jingshut tie-breaker hadien ba ki la ïakhaid da kaba thep mar shi kol. Ka jingïalehkai hapdeng kitei ki ar tylli ki kynhun ka long kaba mar ïakhaid bha. Dei ka Kyntiew Shaphrang HSS kaba la plie pyrda nyngkong ïa ka shi kol hynrei ka Pomlum HSS ka la ïoh ban pynphai kylla ha kajuh ka jingïalehkai jong ka kylla step.
Ki khynnah ïalehkai jong baroh ar tylli ki skul ki la ïakhun tyngeh ha ka kylla miet ban ïoh thep kol hynrei haduh kaba kut ym don ba lah ban pynkhih jar. La ailad biang da ka extra time ïa kitei ki ar tylli ki skul ba kin ïalehkai hynrei ha kane ka kynti ruh baroh ar ki la shu kut tang ha ki jingpyrshang thep kol.
Kumta ban pynthikna ïa ka kynhun ban khur jingjop la rah noh syndon sha ka jingïashut tie-breaker bad dei ka Kyntiew Shaphrang Higher Secondary School, Laitlyngkot ka la long ka lahduh.
Ka Kyntiew Shaphrang kaba long ka lahduh ka la khur ruh ka song pisa kaba 20 hajar tyngka ryngkat ka trophy katba ka Pomlum Higer Secondary School, Baniun kaba wan ba ar ka ïoh 10 hajar tyngka ryngkat ka trophy.
Haba phai pat ha ka liang ki kynthei, ka Pomlum Higher Secondary School, Baniun ka la rah nam lahduh da kaba pynliem ïa ka Raid Sadew Laitjem Secondary School, Sadew bad khur ïa ka song pisa ba 50 hajar tyngka katba ka Raid Sadew Laitjem SS kaba wan ba ar ka ïoh 20 hajar tyngka ryngkat ka trophy.
Katba ka St. Paul’s Higers Socondary School, Marbisu ka la ïoh khur ïa ka song pisa ba 50 hajar tyngka ryngkat ka trophy da kaba pynliem ïa ka He Mont’ Zenith Socondary School, Mylliem kaba ïoh 20 hajar tyngka ryngkat ka trophy.
Ïa ka nam Best Discipline ha la liang ki shynrang la ïoh da ka Marbañiang Umseiñïong SSA Upper Primary School kaba ka Springtime Secondary School, Sadew ha ka liang ki kynthei.
Ïa katei ka 1st SSYWO Free Inter School Knock Out Football Tournament 2022 la sdang ha ka 2 tarik Nailur bad ka la poi noh sha kaba kut ha ka 22 tarik Nailur 2022 hapdeng ka jingiphuh iphieng da ka jingwan ban ai jingkyrshan jong ki khynnah skul ïa la ki jong ki kynhun bad ruh ki paidbah ba kynthup naduh ki longkpa, longkmie, ki samla shynrang bad kynthei haduh ki hep kiba rit. La donlang ruh ki nongkitkam ka SSYWO.
