Mawkyrwat, Jylliew 11: Ka Horirai Syiemlieh Memorial Higher Secondary School, Photjaud-Rangthong, ka Little Star Higher Secondary School, Mawkyrwat bad ka Jakrem Presbyterian Higher Secondary School, Jakrem ki la long ki lai tylli ki kynhun kiba long ki lahduh ha ka lympung ïalehkai kynjatbol ba la tip kum ka Subroto Cup Inter School Football Tournament 2025 ba la pynïaid da ka ophis jong u District Sports Officer, South West Khasi Hills District ha madan Artificial Turf, MDSA, Nonglang, South West Khasi Hills District, Mawkyrwat.
Haba phai ha ki jingïalehkai, ha ka kyrdan ba 17 snem shapoh jong ki khynnah shynrang la jop da ka Horirai Syiemlieh Memorial Higher Secondary School, Photjaud-Rangthong da 4 – 1 kol pyrshah ïa ka Rangthong Christian Higher Secondary School, Rangthong. Ha kaba ïa ki kol jong ka saw tylli ki kol jong ka Horirai Syiemlieh Memorial Higher Secondary School, Photjaud-Rangthong la thep da u Rishotskhem Thongni ha ka minit kaba 20, 45 bad 48 bad ka shi kol na u Thymmaibor Thongni ha ka minit kaba 26 minit.
Ha ka kyrdan ba 17 snem shapoh ba dei jong ki khynnah kynthei la jop da ka Jakrem Presbyterian Higher Secondary School da 3 – 1 kol pyrshah ïa ka Rangthong Christian Higher Secondary School ha ka Tie Breaker.
Nangta, ha ka jingïalehkai jong ki khynnah shynrang ba hapoh ka 15 snem la jop da ka Little Star Higher Secondary School, Mawkyrwat kaba la thep 3 – 0 kol pyrshah ïa ka Tyllilang Secondary School, Nongbah-Marshilong. Ha kaba ïa ki kol jong ka Little Star Higher Secondary School, Mawkyrwat la thep da u Banjoplang Thongni-rit ha ka minit kaba 29 bad 48 bad na u Regentman Snaitang ha ka minit kaba 34.
Ha kaba kut jong ka jingïalehkai la ïoh ban sam ïa ki khusnam sha baroh ki kynhun kiba la poi sha ka phainal kata kiba jop bad kiba la shah rem noh ruh.
Lah ban kdew ba kiba la wan ïa shimbynta ha kane ka Subroto Cup Inter School Football Tournament 2025 ki don baroh 737 ngut ki khynnah skul kata 15 kynhun ha ka Under-15 jong ki khynnah shynrang, 14 kynhun ha ka Under-17 jong ki khynnah kynthei bad 18 kynhun ha ka Under-17 jong ki khynnah shynrang.
U kongsan uba la wan ban pynhap pyrda ïa kane ka Subroto Cup Inter School Football Tournament 2025 u dei u bah F.B. Basan, MCS, Additional Deputy Commissioner ka South West Khasi Hills District ha ryngkat ka jingdonlang u samla Chesterpaul Lyngdoh uwei na ki ‘rangïalehkai uba la paw ha ka District, ka Jylla bad ka Ri India nangta u bah D. Syngkon, District Sports Officer ka South West Khasi Hills District lem bad kiwei de kiba la shah khot sngewbha.
