Lahduh ka East Khasi Hills ha ka State-Level Wushu Championship, wan ba ar ka West Jaintia Hills

Shillong, Naitung 28 : Ka Meghalaya Wushu Association (MWA) ka la pynlong jop ïa ka 23rd Meghalaya State-Level Wushu Championship 2026 ha Rajeev Wushu Hall, Assam Regimental Centre (ARC), Happy Valley, Shillong kaba long naduh ka 24 haduh 25 tarik Naitung 2026.
Ha kane ka lympung jingïalehkai kaba ar sngi, la ïashim bynta da kumba 300 ngut ki nongïalehkai na baroh ki distrik jong ka Meghalaya, kaba la long kawei na ki State Championship ba heh tam ba la pynlong da ka Meghalaya Wushu Association. Kane ka lympung ka la ai lad ïa ki nongïalehkai ban pyni ïa ka sap, ka jingïalehkai bap aka bad ka jingïakhun kaba tyngeh, hynrei ka la long ruh ka rynsan ban jied ïa ki nongïalehkai kiba don sap ban mihkhmat ïa ka jylla ha ki jingïakob bah eh ha ka ri kiban sa long shen.
Ïa kane ka Championship la wan ban plie ha ka 24 tarik Naitung da u Brigadier Vikash Rai Shandaliya, Commandant jong ka Assam Regimental Centre, Happy Valley, Shillong kum u Kongsan. La synran ïa u da u Bah Donny R. Ranee, President ka Meghalaya Wushu Association, ryngkat bad ki nongkitkam jong ka Association, ki nongmihkhmat na ki distrik, ki coach, ki official, ki nongïalehkai bad kiwei pat ki riew rangbah.
Ha ka jingkren pdiang sngewbha, u Bah Donny R. Ranee u la pdiang burom ïa u Kongsan, ki riew rangbah, ki official, ki coach, ki nongïalehkai bad ki paidbah kiba la wan ban sakhi ïa kane ka lympung.
Ka jingïalang pynhap pyrda ïa ka Championship ka la long ha ka 25 tarik Naitung ha kaba u Bah Ian Lyngdoh, Vice President jong ka Meghalaya State Olympic Association (MSOA), u la long kum u Kongsan, katba u Lieutenant Colonel Gangte, Officer In-Charge jong ka ARC Wushu Node bad Boys Sports Company, Happy Valley, Shillong, u la long kum u Symbud Kongsan.
La donlang ruh u Bah Donny R. Ranee, President ka Meghalaya Wushu Association, u Bah Jerry F. Wankhar, General Secretary ka Association, ki dkhot Executive bad ki nongmihkhmat na baroh ki District Wushu Association.
Hadien ar sngi ki jingïakob kiba itynnad ha ki jingïalehkai Sanda bad Taolu, la pynbna ïa ki Team Champion kiba kynthup ïa ka East Khasi Hills ban khur ïa ka nam lahduh da kaba khur haduh 300 point, bud sa ka West Jaintia Hills ha ka kyrdan kaba ar da 180 point bad ka East Jaintia Hills pat da ki 100 point pat ha ka kyrdan kaba lai.
Ka Meghalaya Wushu Association ka la ong ba kane ka Championship ka long ka rynsan kaba kongsan ban jied ïa ki nongïalehkai kiba kynsai ban pynkhreh na ka bynta ka 39th National Games 2027, kaba la tyrwa ban pynlong ha Arunachal Pradesh.
Ki nongïalehkai kiba shah jied kin ïoh ïa ka jinghikai kaba bniah bad ki prokram jingïoh jinghikai ban pynkhreh ïa ki ban wanrah nam bad burom ïa ka Meghalaya da kaba khur takma ha ka National Games.
Ha ka jingïalang pynkut, u Bah Jerry F. Wankhar, General Secretary, u la ai khublei ïa u Kongsan, u Symbud Kongsan bad u Brigadier Vikash Rai Shandaliya na ka bynta ka jingai jingbit ban pynlong ïa kane ka Championship ha Rajeev Wushu Hall.