Shillong, Nailur 15 : Ki khynnah jong ka skul Christ Church Morning School,Mawlai Syllaikariah ki la lah ban khur ïa ka burom kum ka lahduh jong ka IX Inter School Knock Out Football Tournament 2023 ba la pyniaid da ka Federation of Khasi Jaintia and Garo People (FKJGP), Mawlai Circle ha madanheh mini stadium da kaba pynliem ïa ka Umrynjah Presebyterian Secondary School, Umrynjah da 2-0 kol ha ka jingïakhun jong ka final kaba la long hynne ka Sngi Thohdieng.
ïa ka namtam ha kane ka jingïalehkai la khur da u Precious Muktieh u ba la khyrwit ïa baroh ar kol kiba la thep ha ka kyllamiet ban btin lynti ïa ka skul (Christ Church Morning School) ban ïohrah ha ka sien ba nyngkong ïa kane ka Inter Skul jong ka FKJGP, Mawlai.
La ïoh ruh ban sam khusnam shimet na bynta ki nongialehkai kiba kynsaitam, kiba kynthup ïa ka nam Promising Player kaba la khur da u Medonryngkat Kharumnuid (Mayqueen SS), Top Scorer lane u ba la ïoh ban thep bun kol la khur da u Kitborlang L. Marshillong jong ka Christ Church Morning School, Best Golakeeper la khur da u Damanbha Warjri, na ka skul Umrynjah Presbyterian, ka nam rangïalehkai ba kynsai lane Best Player la khur da u Kitborlang katba ka Mayqueen Secondary School ka la ïoh ban khur ïa ka khusnam Best Dicipline Team ha kane ka tournament .
Ha kane ka sngi pynhap pyrda ïa kane ka lympung la wan sakhilang da u Bah Eldie N. Lyngdoh, General Secretary ka FKJGP, Sengkmie kum u Kongsan, u Kitborlang Nongphlang, vice president ka FKJGP, Sengkmie kum u symbud kongsan, ryngkat u bah Tamdor Nadon u ba shah khot sngewbha, u bah Khrawkupar Nongsiej, president FKJGP, Mawlai Circle, bah Johny Khongsit, bah Shanbor Rapsang, bah Dunli Majaw, kiba ïoh bynta ban sam ïa ki khusnam bad ruh takma sha ki khynnah lehkai, bad kiwei kiba la don ryngkatlang ha kane ka sngi ki kynthup ïa ki nonghikai jong ki skul bapher bapher, ki khynnah skul bad kiwei kiwei.
Kumban shu pynkynmaw, ha u ne u snem ki la don haduh 15 tylli ki skul kiba la wan ban shimbynta ha kane ka tiurnament kaba la pynïaid da ka FKJGP Mawlai Circle, kaba la buh ryngkat bad ka phang pdeng kaba ong, “Em ïa u Drok, Ho-oid ïa ka Phutbol”, kaba kane ka seng ka ju pynlong man u snem.
Ha kane ka sngi la ioh ia ka jingkren na u kongsah u bah Eldie uba la pynpaw ba ki nongwei ki la wan ban pynjot ïa ka ri baieit ban khaii ïa ki drok kiba la pynjot ïa kiba bun ki khun samla ka ri. U la kyntu ruh ïa ki khynnah skul bad kumjuh ïa baroh ki khun samla ba kin kiar na u drok, naba kino kino ki samla kiba la ngop ha une u jait jingdih ki shah peit shah peitkhmat ryngkat bad ka shah kyntait ha ka imlang sahlang. La ïoh ruh ka jingkren lyngkot na u symbud kongsan u bah Kitborlang u ba la pynpaw ba bun kiba shah kem khaiï drok ki dei ki bar jylla, kiba pyni ba kine ki leh thma jar jar ia ka jaitbynriew lyngba une u jingdih basniew.
