Mawkyrwat, Naitung 02: Ka Ranikor Civil Sub Division Sports Association (RCSDSA) ha ka 1 tarik u ‘Naitung, 2025 ka la ioh ban pynhap pyrda noh ia ka 1st Division Football League jong u snem 2024 – 2025 ha kaba ka Balat Sports Club ka la pynliem noh ïa ka Mawpyllun Sports Club da 2 – 0 kol ha madan Nolikata, Ranikor Civil Sub Division.
Kum ban shu pynkynmaw ka Ranikor Civil Sub Division Sport Association (RCSDSA) ka dei ka association kaba la kham slem hynrei kam pat shem la ïoh jingithuh na ka Meghalaya Football Association, hynrei ha kane ka kynti ha ka jingïalam jong u President jong ka Meghalaya Football Association (MFA), bah Hamlet Dohling, u la ai ka jingkular ba shen ka Ranikor Civil Sub Division Sport Association kan sa ïoh jingithuh noh na ka Meghalaya Football Association (MFA) khnang ba kan nang lah ban pyntyllun ïa ki kam ïalehkai na kawei ka por sha kawei pat.
U bah Hamlet Dohling, uba dei u President jong ka Meghalaya Football Association (MFA) haba kren kum u kongsan u la ong ba ha ka 12 tarik ‘Naitung, 2025 kin sa ïa shong noh ka committee ban rai ba yn ithuh noh ïa ka Ranikor Civil Sub Division Sport Association da ka Meghalaya Football Association (MFA). Ula ong ruh ba ka Balat Sports Club kaba dei ka lahduh ha kane ka 1st Division Football League jong u snem 2024 – 2025 kan sa ïoh ban ïa khun sa ha ka Meghalaya State League (MSL).
Ha kajuh ka por u la ai mynsiem na ka bynta ki ‘rangïalehkai ba ki dei ban long kiba trei shitom ryngkat ka jingïai pynmlien ban kilanmet namar kum ka association ka dang don ha ka lynti ban jied ïa ki ‘rangïalehkai kiba tbit ka kino kino ki bynta jong ka jingïalehkai kynjatbol. “Lada ki nongïalehkai ki don ka jingtbit katno katno ruh khlem ka jinglong rynrih ha ki liang baroh ka long leh noh ei”, ong u bah Hamlet. Namarkata, u la kyntu ba long borabor ki nongïalehkai kiba biang por, kiba tbit bad kiba shemphang khnang ba kin lah ban nang kiew sha kiwei pat ki kyrdan namar ka jingïalehkai ka la long kawei na ki lad ban kamai jakpoh.
Ha kane ka sngi la sakhi ruh da ki riew rangbah naduh u bah Kitborlang Nongrem, Secretary jong ka NPP In-Charge South West Khasi Hills District, ki ophisar sorkar bapher bapher jong ka Ranikor Civil Sub Division lem bad kiwei kiwei.
