SHILLONG, Jylliew 06: Ka kynhun ïalehkai ki khynnah shynrang Under-15 jong ka Assam Rifles Public School bad ki samla lud kynthei Under-17 jong ka Tyrsad Hr. Sec. School ki la lah ban pynthikna ïalade kum ki lahduh ha la ki jong ki kyrdan jong ka lympung ïalehkai phutbol ba la tip da ka ‘District Level Inter School Subroto Mukherjee Cup Football Tournament 2025′ bala pynïaid da ka ophis treikam u District Sports Officer (DSO) East Khasi Hills District.
Kane la pynthikna hadien ba ki la jop ïa ka phainal kaba la long hynne ka sngi Thohdieng ha Madan Heh-Mawlai. Ka Assam Rifles Public School ka la lah ban pynliem noh da 4-3 ha ka tie breaker ïa ka O. M. Memorial Hr. Sec. School hadien ba ka jingïalehkai ka la kut ha ka jingïakhaid da mar 1-1 kol, katba ki thei ïalehkai jong ka Tyrsad Hr. Sec. School ki la lah ban pynliem ïa ka Sacred Heart Boys’ Hr. Sec. School lyngba ka 1 kol ba la thep da ka Wanrihun Kharnaior (47’min).
Kum ki lahduh kine ki kynhun, kata ka Assam Rifles Public School bad ka O. M. Memorial Hr. Sec. School (Under-15 Boys) bad ka Tyrsad Hr. Sec. School …Sacred Heart Boys’ Hr. Sec. School (Under-17 Girls) kin ïoh ban mihkhmat ïa ka East Khasi Hills District ha ka State Level Inter School Subroto Mukherjee Cup Football Tournament 2025 ka ban sa sdang shen ynda la kut ki jingïalehkai ha man ki District.
Nalor ki khusnam lahduh la sam ruh ïa ki khusnam kyrpang ïa ki nongïalehkai ba kynsai ha kaba u Lazarus Pohtmi u la khur ïa ka nam Player of The Tournament bad u Elvin Kharsahnoh u la ïoh Best Goalkeeper ha ka kyrdan Under-15 Boys, katba Mercylina Umdor ka la ïoh nam Best Goalkeeper nangta ka Balabet Khongsit ka la khur ïa ka nam Player of The Tournament ha ka Under-17 Girls.
Haba phai sha ka Under-17 jong ki shynrang kaba la jam mynta sha ka Pre Quarter final, hynne ka sngi Thohdieng (06 tarik Jylliew, 2025) saw tylli ki kynhun ki la pynthikna ban jam sha ka Quarter final hadien ba ki la jop ïa la ki jong ki jingïalehkai ba la long ha SAI, NEHU.
Ka H.Elias Memorial Hr. Sec. School ka la lah ban pynliem noh da 1 kol ïa ka Mount Hermon Hr. Sec. School lyngba ka kol ba la thep da u Gabriel Samiam (36’). Kumjuh ruh na ka liang jong ka Shillong Vidhyalaya Sec. School ka la pynliem ïa ka Assam Rifles Public School da 3-1 kol.
Ka St. Anthonys Hr. Sec School ka la pynjemkhnap haduh 5 kol ïa ka RamaKrishna Mission School, nangta ha ka jingïalehkai kaba khatduh ka Rev. T.J. Jones Presbyterian School ka la jop da tang 1 kol ïa ka Sacred Heart Boys’ Hr. Sec. School.
Ha kane ka sngi Saitjaiñ (07 tarik Jylliew, 2025) kin don sa saw tylli ki jingïalehkai ba dang sah jong ka Pre Quarter final jong ki khynnah shynrang Under-17.
