Lahduh ka 7 Wasa United ha ka ‘Super Division Football Tournament -2022’ ka WJDSA

Jowai Risaw 09: Ka 7-Wasa United kala long syndon kum ka lahduh haka lympung ïalehkai ‘14th U Kiang Nangbah Memorial Trophy Super Division Football Tournament-2022, bala pynïaid da ka West Jaiñtia District Sports Association (WJDSA) ka ban sa long ha kane ka sngi saitjaiñ 8 tarik u Risaw ha madan Kiang Nangbah Stadium, Dongmihsngi Jowai.
Ïa kane ka lympung ba pynïaid da ka West Jaiñtia District Sports Association (WJDSA) ka long shi bynta na ka jingrakhe jubilee ksiar jong ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Ka kynhun ïalehkai jong ka 7-Wasa United ka la ïoh rah ïa kane ka nam jop, hadien ba kala lah ban pynliem da 2-0 kol ïa ka Ladthadlabob SC ha ka jingïakhun phainal bad ïa kitei ki ar kol na ka 7-Wasa United la thep marwei da u rangïalehkai jong ka u Buromlangki Salahe.
Haba phai sha ka jingïakhun jong kine ki ar kynhun kala long shisha kaba itynnad bad kaba la pynhun shisha ïa ki nongwan peitkai na baroh arliang, ha ka jingïakhun jong ka kylla step ka 7-Wasa United kala ïoh ban pynkhih ïa ka jar ba nyngkong ha ka minit kaba 32 bad ka jingïakhun jong ka kylla step kala kut da 1-0 kol.
Hynrei haba wan ban bteng ïa ka jingïakhun jong ka kylla miet ka Ladthadlaboh FC kala pyrshang katba lah ban ïalehkai bha na ka bynta ban ïoh pynphai ïa katei ka shikol hynrei da ka jingtriem ki nongap ba shadien jong ka 7 Wasa bad kim shem la ailah satia ïa ki nongïalehkai ba shakhmat ka Ladthadboh ban thep kol.
Katba ka jingïakhun ka dang ïaid bha shakhmat bad dei ha ka minit kaba 90 kala 7-Wasa United kala ïoh biang ban thep ïa ka shikol lyngba utei u player jong ka kaba la pynlong shisha ïa ka 7-Wasa ban rah syndon ïa ka nam lahduh jong kane ka lympung Super Division mynta ka snem 2022.
Ïa kane ka lympung ïalehkai phainal jong ka ‘14th U Kiang Nangbah Memorial Trophy’ Super Division Football Tournament-2022 la wan ban sakhi ha kaba sdang jong ka jingïalehkai da u Sniawbhalang Dhar MLA kum u kongsan uba long ruh u myntri ka sorkar jylla ba dei peit ïaka kam pynroi sor bad kiwei.
Haba ai jingkren ula ai ka jingïaroh ïa ki bor pynïaid jong ka WJDSA kiba la lah ban pynïaid beit ïa kane ka lympung haduh ba kut, ha ka juh ka por u ai ka jingkitbok kitrwiang ïa baroh ar kynhun ba ïakhun phainal ba kin don ïa ka mynsiem ïalehkai namar ha ka jingïakhun don kiba jop bad don ruh kiba shah rem.
Kiwei de kiba ïadonlang ha kane ka sngi ki kynthup ïa u Dolloi ka Elakak Jowai ma Puramon Kynjing, u District Sports Officer ma K. Passah, Hony. General Secretary ka WJDSA ma Lammat-oo Laloo, u Prafulla Kumar Boro, MCS Additional Deputy Commissioner WJHD, ki MDC, ki nongkitkam ka Association, ki nongmih khmat na ki Club bapher bapher nalor kiwei de kiba la shah khot sngewbha.
Ha kane ka sngi la sam ruh ïa ka khusnam sha ka kynhun jong ka lahduh (Champions) da ka song pisa kaba 60 hajar tyngka lem bad ka trophy, ka kynhun na wan ba ar (Runner’s-Up) kala ïoh rong ïa ka song pisa ba 35 hajar tyngka lem bad ka trophy.
Katba ïa ka nam Top Scorer la ïoh da u Pynishai Lathong ka Nangbah Mulang, Best Goalkeeper da u Sbing Chyrmang ka Ladthadlaboh, Man of the Match da u Buromlangki Salahe ka 7 Wasa United bad ïa ka nam Player of the tournament la ïoh rah da u Sanjini Dkhar na ka 7 Wasa United.