Shillong, Nailar 27: U Symbud Myntri Rangbah ka jylla u Bah Prestone Tynsong ha ka sngi baar u la ong ba la palat 7 snem kata naduh u snem 2017-2024, ka jingdon kiba khlem kam khlem jam ha Meghalaya ka la hiar bha kaba la sdang nyngkong da kaba heh kaba long 8.8% ha u snem 2017-2018 bad ka la hiar haduh 1.9% ha u snem 2021-22. Ïa kane u la pynshong nongrim halor ka jingai jingkheiñ jong ka Centre for Monitoring of Indian Economy.
Haba jubab ïa ka phang ba la wanrah da u MLA ka UDP u Bah Lahkmen Rymbui ha Dorbar Synrai, u Bah Tynsong u la ong ba ka jingdon kiba khlem kam khlem jam ha Meghalaya ka la long 3.9%, katba ha India ka jingdon kiba khlem kam khlem jam ka la poi 7%. Kumjuh ruh ka jingkheiñ jong PLFS na ka bynta ka Meghalaya, ka pyni ïa ka jingneh ha kaba kiba khlem kam khlem jam ka long 2.92% haba nujor ba ka jingdon kiba khlem kam ha ka ri baroh kawei kaba long 4.7%, ha ka juh ka snem.
“Ka jingdon kiba khlem kam khlem jam ha Meghalaya ka la hiar bha haba nujor bad ka ri baroh kawei. Kane ka jingkheiñ ka pyni ba ka Meghalaya ka la kham pher haba ïadei bad ki lad ïohkam ïohjam,” u la ong.
Haba pynpaw ïa kiba bun ki sienjam ba la shim da ka sorkar jylla ban peit ïa kane ka jingeh jong ka jingkyrduh kam kyrduh jam u Bah Tynsong u la ong ba ka sorkar ka la thmu ban pynmih kumba 5 lak tylli ki lad aikam aijam ha u snem 2028.
Kumba 2.3 lak na kine ki lad kin wan na ki kam rep kam riang bad kiwei pat ki kam.
Nangta sa ki kam khaïi, ki hotel bad ka kit ka bah ba la khmih lynti ba kin pynmih kam kumba 1.5 lak.
Na ki kam jingtei bad ki kam shna jingshna kin ai kam kumba 53000 bad 23000 ngut.
Na ki kam tih bad ki kam bording baroh kin pynmih kumba 7500 ki kam katba ka real estate kan ai kam kumba 2500 ngut ki briew.
U la pyntip ba haduh mynta ka sorkar ka la pynlut kumba T. 7 klur ha ki Skill Meghalaya programme. Katba ka jingïoh kamai ba lah ban ïoh da ki nongïoh myntoi la khmih lynti ba kan long kumba T. 37 klur ha ka shisnem. Na kane ka pisa ka ban wanphai sha ka sorkar kan long T. 7 klur na kaba la pynlut.
Ka sorkar ka la buh palat T. 53 klur kum ka pisa ban ai jinghikai bad T. 31 klur ka bai tiar ban sdang bad ban hikai ïa kumba 26000 ngut ki nongïoh myntoi ha ka snem 2024-25, u la ong.
Shuh shuh u Bah Tynsong u la ong ba ka sorkar ka la buh bun ki lad ki lynti na ka bynta ban thaw kam thaw jam ha ka jylla ha kaba kane kan ïarap ban pynduna ïa ka jingkyrduh kam.
“Ngi kwah ban pynthikna ïa phi ba ka sorkar ka la trei khlem sangeh ban thaw ïa ka jylla kaba bha bad ngi donkam ka jingïatreilang bad jingkyrshan jong manla uwei pa uwei u nongshong shnong ka jylla,” u la ong.
Haba ong ba ka sorkar Meghalaya dalade ka dei ka nongthaw ïa ki kam ha ka jylla, u Symbud Myntri Rangbah u la ong ba katkum ka khana samari halor ka jingdon ki nongtrei ka sorkar ha u 2022 kat haduh ka 31 tarik u Lber, 2022 ka la long 60,836 ngut.
U la pyntip ba ka sorkar ka la pynmih ïa ki SOP na ka bynta ban pyndap kloi ïa ki kam kiba thylli, ka jingpynmih ïa ki advertisement na ka bynta ki kam kiba thylli bad ka jingpynlong ïa ki recruitment exam. Ki la don kumba 954 ki kyrtong bad kumba 92 ngut ki kyrtong kiba la mynjur da ka MPSC bad DSC naduh u bnai Ïaïong, 2021.
Hapoh ka jingthep kam jong ka sorkar pdeng ne ka central recruitment board, u la ong 996 tylli ki kam ba thylli ha ki kyrdan bapher bapher jong ka Meghalaya police la pyndap ha u snem 2023 bad kumba 3000 ki kam ba lait yn sa pyndap ha u snem 2024.
U la ong ba na ka liang ka Meghalaya Medical Recruitment Board ka la lah ban pyndap ïa ki kam kumba 455 tylli na ki kam kiba thylli kynthup ïa ki 103 ngut ki specialist bad kumba 164 ki kam na ka bynta ki staff nurse bad kumba 78 ki ANM yn sa thung shen.
