Shillong, Risaw 22: Ka seng AI JINGIM kaba dei ka seng kaba ju ïarap ban ai snam ei ka dei kawei na ki seng kaba la kiew bha ha kaba ïadei bad kane ka jingleit ban ai jingïarap khamtam ïa ki longïing kiba duna ha ka ïoh ka kot.
Lah ban ong ba ïa kane ka seng AI JINGIM la seng naduh ka snem 2006 kum ka seng ka ban ïarap ïa ka imlang sahlang ha kaba ka jaka treikam jong ka ne ka Head Quarter ka don ha Laban, Shillong bad ka don ruh la ki jong ki working unit ha baroh ki District jong ka jylla Meghalaya.
Na ka liang ki nongkitkam ki la ïathuh ba ïa ka AI JINGIM la pynrung kyrteng hapoh ka Registration of Societies ACT 12 jong u snem 1983 da ka registration number No.E.16/4/ jong u snem 2009/89.
Ïa ka AI JINGIM la ithuh ruh da ka tnat Health & Family Welfare, ka sorkar Meghalaya bad kumjuh ruh da ka Meghalaya AIDS Control Society bad ki dkhot jong ka Meghalaya State Blood Transfusion Council.
Ïa ki dkhot ka committee jong ka AI JINGIM ki kynthup ïa ki nongseng, ki dkhot ka Advisory Board, ki Executive bad kiwei kiwei ki dkhot, bad kynthup ruh ïa baroh ki Voluntary Blood Donors kiba don ka jingïatreilang bad ka seng AI JINGIM.
Kumba long haduh mynta na ka liang ka AI JINGIM ka la dep ban synniang snam palat 2137 unit, la pynlong ruh ïa palat 75 Blood Donation Camp. La don ruh kumba 93 tylli ki prokram pynsngewthuh paidbah ha baroh kawei ka jylla.
Kumba long mynta ki dkhot jong ka AI JINGIM ki don 372 ngut ha kaba 112 ngut dei ki kynthei bad 260 ngut dei ki shynrang.
