Shillong, Nailur 19: U MP ka VPP na Shillong u Dr Ricky AJ Syngkon u la ai jingmut ïa ka sorkar pdeng halor ka jingdonkam ban pynbha noh ïa ka kad lieng ne ka Dawki Land Port.
Lah ban ong ba ka Ministry of Home Affairs Department ka Border Management ka la buh ïa ka land port ne ka kad lieng kaba nyngkong ha ka jylla ha ka 4 tarik u Jymmang, 2023.
Ha ka shithi ba u la phah sha u Chairman, Land Port Authority of India, Aditya Mishra, u Dr Syngkon u la ong, “Ha ka 14 tarik mynta u bnai, 2024 dalade nga la leit ban jngoh ïa kane ka jaka ba don ïa ka kad lieng ban peit ïa ka jinglong jingman jong kane port bad ha kane ka jingwan jngoh na la ïohi ki don bun ki bynta ba hap ban khmih kham kloi katba lah ha kaba ïadei bad ka jingtreikam bha jong kane ka kad lieng.”
Ha kaba ïadei bad ki lad jingtei, u MP ka Shillong u la ai jingmut ba kam dei ban don ka jingthut ha kaba ïadei bad ka jingsam ïa ka bording sha kane ka jaka baroh kawei.
U la ong ba ka network bad ki lad jingpynïasoh ne communication ka long shisha kaba duna bha bad ka donkam ïa ka jingkmih mardor kaba kongsan kaba kynthup ïa ka jingpynheh ïa ka surok sha kane ka kad lieng kaba mynta ki dang maramot bad dei ruh ban pyndep kloi.
“Ka ïing ne ka jaka ba buh ïa ki mar khaiñ ne Warehousing kaba kynthup ruh ïa ka cold storage dei ban tei. Ki jaka khmih bniah ne Testing dei ban don khnang ban pynthikna ïa ki jinglong jong ki jingpynmih kiba pyut bad ki bym pyut (perishable and non-perishable items),” u la ong da kaba bynrap ba ka jingplie ïa ki jaka kynshew pisa ne ki bank ka long kaba donkam na ka bynta foreign exchange bad kiwei pat ki kam ba ïadei bad ka jingkynshew pisa nalor ki ATM bad ka jingdonkam ki jaka ban pynïeng ïa ki kali.
U la ong ruh ba ïa ka port ne kad lieng dei ban peit ne pynïaid da ki briew kiba la tip ïa ka kam ym pat da kiba khlem don jingtip halor kane ka kam.
“Ka jingai kam dei ban long shwa nyngkong ïa ki nongshong shnong ka jylla ba kynthup ïa ka managerial bad kumjuh ruh ïa ki kyrdan non- managerial,” u la bynrap.
