Shillong, Naiwieng, 29: Ka jingïakren pynbeit pud ha ka wat kaba ar hapdeng ka Jylla Meghalaya bad ka Jylla Assam ban ïa pynbeit ïa ki hynriew tylli ki jaka ba ïakajia pud ka la dang ban pynmih ïa ka jyrwit jyrwat bad ka lah ban kham slem shuh shuh na ka daw ka jingjia ha ka 22 tarik mynta u bnai ha ka shong Mukroh, la ïathuh u Myntri Rangbah ka Jylla u Conrad K Sangma ha ka sngi Baar.
Ha ka jingïakren bad ki lad pathai khubor, u Sangma u la ong ba u la khmihlynti ba ka jingïakren pynbeit pud ha ka wat kaba ar ka dei ban long ha une u bnai.
“Hynrei da kane ka jingjia, ka jinglong jingman kan kham kyllaiñ khyndiat bad ngin ym lah ban pynsdang noh mardor ïa ka jingïakren watla ngi sngew ba ïa kane ka kam dei ban pynïaid noh shakhmat,” u la ong.
Da kaba pynpaw ba ka Sorkar ka la kut jingmut ban ïapynbeit noh ïa ka jingïakajia pud ba la sahteng bad ka Assam, u Myntri Rangbah u la ong, “ngi kwah ban pynstet ïa ka kam katba lah namarba kane kan pynkut syndon junom ïa ki jingjia bad ba lah ban pynkiar ha ki sngi ki ban sa wan hynrei na ka daw ka jingjia kaba sngewsih ha ka shnong Mukroh, ki jingkhmihlynti ki la kylla.”
“Namarkata, ngi hap ban ap shwa shipor, ngi hap ban ïakren bad ka Sorkar Assam bad ka Sorkar India bad ngin sa peit kaei ka ban jia ynda ladep ïakren bad ki,” ula ong.
Ha ka 22 tarik mynta u bnai, hynriew ngut ki briew ba kynthup ïa san ngut ki Pnar bad uwei u nongap pahara khlaw ka Sorkar Assam ki la shah siat ïap ha ka jingsynreit kuli pathar jong ki Pulit Assam ha ka shnong Mukroh, West Jaiñtia Hills.
