Shillong, Nohprah 19: U Inspector General of Police, (SB/Bdr.) u Dalton P Marak ha ka sngi Palei u la ong ba baroh ki admit card ha kaba ïadei bad ka Physical Efficiency Test (PET) ha ki 4 tylli ki center jong ka 1st MLP Bn., Mawïong, Shillong; ka 2nd MLP Bn., Goeragre, Tura; ka 4th MLP Bn., Sohpian, Nongstoiñ bad ka 5th MLP Bn., Samanda, Williamnagar ki la don bad ki candidate ki lah ban download naduh ka 16 tarik mynta u bnai, 2024.
Ki Candidate kiba ïakhun ïa ka PET na kitei ki 4 tylli ki center, la kyrpad ba kin download ïa ki admit card napoh ka Meghalaya Police website ka -www.megpolice.gov.in.
Ki Candidate kiba jied ban pynkylla ïa ka tarik na ka bynta ka eksam PET la kyrpad ba kin sngewbha ban aiti ïa ki application sha Member Secretary, Central Recruitment Board, Meghalaya Police hapoh ophis jong ka Central Recruitment Board, Mawroh, Shillong ne da ka email ha policetrg-meg@gov.in bad ba kin upload baroh ki kot kiba donkam ha kaba ïadei bad kane ka kam.
Halor kane na ka liang u Marak u la ong ba ïa ki candidate la shah ba kin pynlla ïa ka tarik jong ka eksam Physical Efficiency Test (PET) tang shisien, bad kane ka jingkwah ban pynkylla ïa ka tarik ka dei ruh ban don da ka daw kaba biang. Ka tarik ba khatduh ban pdiang ïa ki application na ka bynta ban pynkylla ïa ka tarik na ka bynta ka Physical Efficiency Test (PET) kan long ha ka 2 tarik u Kyllalyngkot, 2025 bad yn ym pdiang shuh ïa ki application hadien jong katei ka tarik kaba khatduh.
Shuh shuh la ai jingmut ïa ki candidate ba ki dei ban peit bha ïa ka official Meghalaya Police website na ka bynta ban tip ïa ki jingpynkylla ne ban update ïalade, bad kumjuh ruh na ka bynta kino kino ki jingkylli kidei ruh ban contact ïa ka ophis jong ka Central Recruitment Board kaba don ha Mawroh, Shillong lane ban ïakren bad ka tnat lyngba ka helpline no.6033164273 ha ki sngi longtrei manla ka sngi.
