Shillong Nohprah 19: Kum shi bynta na ka jingpynkhreh jong ka jingwan ka sngi Khrismas na ka liang ka Junior Christian Endeavour Society (JCES) Mawkhar ka la pynlong ïa ka jingïaid Carol jong ki hep kiba rit ha ka sngi Palei naduh ka por 11:00 baje mynstep ha kaba ïa kane ka jingïaid Carol ka la sdang na Ïingmane Balang Presbyterian Mawkhar, kaba la ïaid pat sha ka Motphran, nangta sha GS Road, la pynkhun noh sha Umsohsun, nangta sha Wahingdoh, mih pat sha ka ïing Syiem ka Mylliem, nangta sha Motphran bad la pynkut biang hapoh phyllaw Ïingmane.
La ïohi ba ha kane jingïaid Carol ki hep kiba rit ki la shim bynta da ka jingsngew kmen namar la iathuh ba mynta la kumba ar snem ki khlem ïoh shuh ban ïaid ïa kane ka Carol.
La ïathuh ba ka daw hi jong ka jingbym ïoh ïaid christmas carol ka long ba na ka liang ki nongpynïaid ki sngew ba ka long kaba eh ban phah ïaid Carol ha ki surok bad ki lynti synkien na ka daw jong ka jinglah ban don ka jingjur ka jingdheng kali.
“Mynta u snem ngi la shim ka rai ban pynlong ïa kane ka jingïaid Carol noh da kaba shu ïa ïaid ha lynti synkien bad ha surok ban pynkmen ïa ki hep kiba rit bad kumjuh ruh ïa ki samla, bad shisha ngi la ïohi mynta ka sngi bad ki la kmen shisha,” ong u Bah Don War uba long uwei na ki nongïaid ïa kane ka Carol ha kane ka sngi.
Ha kaba ïadei bad kane ha shwa ban sdang ka jingïaid Carol la don ka jingkren lyngkot na u Rev. Pastor B Syiemlieh uba la ïathuh khana shaphang ka jingkha ïa U Jisu Christ ha kane ka pyrthei kaba long ka daw jong kane ka jingïaid Carol kaba la pynlong ha kane ka sngi.
U la ïathuh ruh ba kane ka jingpynlong ïa kane ka jingïaid Carol ka dei ruh shibynta na ka jingrakhe ka JCES Mawkhar ïa ka jingdap 125 snem.
Ha kane ka jingïaid Carol la ïohi ïa ka jingsngew kmen ki samla bad ki hep kiba rit kiba la ïa rwai jam, kiba la ïa shad ruh ha shilynter jong ka surok ba la ïaid kane ka christmas carol ha kane ka sngi bad la ïohi ruh ba u phadar Christmas u la ai ruh ïa ki mit mit ïa ki khynnah rit katba ïakynduh ha lynti synkien bad kumjuh ruh kiba shong hapoh ki kali bad hadien kane haba pynkut ïa kane ka jingïaid Carol ka la don ruh ka jingrwai kmen hapoh phyllaw jong ka ïingmane da ki hep kiba rit bad kumjuh ruh ki samla bad ki kmie ki kpa kiba la synran lang ha kane ka sngi.
