Nongstoiñ, Rymphang 22: Ym tip thikna lane lah ban ïathuh lypa mano ban jop, hynrei ka sur na kylleng ki Constituency, ka pynpaw ba ka HSPDP bad VPP hi dei ki ar tylli ki party kiba kham paw khmat ha kane ka elekshon MDC ba mynta.
Ha Nongstoiñ watla u candidate u Dr Juristman Ïawphniaw u dang khynnah dang thymmai bad dang tang ar bnai lai bnai sha ka rynsan politic. Hynrei, ka party VPP kaba u ïaleh ka dei kaba pawnam tam bad kaba don jingkyrmen, namar ki paidbah na kylleng ki phaikhmat sha kane ka party.
Na ka liang ka HSPDP watla I kong Badariti Lyngdoh Nonglait I la pynkhynñiuh bad donbor bha ban ïalap elekshon ha Nongstoiñ. Hynrei ka lada phai pat sha ka jingïoh vote kane ka party ha u 2023 ka long tang shihajar tam. Ka jingkylli ka long hato ka vote ba khlaiñ bor jong kane ka party kan wanphai biang mynta ka kynti.
Ha Mawshynrut ruh ka jingïaleh imat kan long beit tang hapdeng ka HSPDP bad VPP. U Babu Birbor Riangtem na ka VPP u dei u ba dang thymmai ha ka politik, hynrei kumba long sha kiwei ki bynta ka ri Khasi ka lyer u prah ka jur bha.
Hynrei, ka sur na kiba bun ki ong ba imat yn syllad ka HSPDP, namar ka jingdon u sitting MLA u ba dang shu jop ruh dang shen ha Mawshynrut Constituency.
Shuh shuh ka jingdon ka vote Garo ka dei kawei pat kaba ym lah satia ban batai, ba hato ki garo kin bud ïa u Bah Methodios sitting MLA lane kin phai sha u prah. Nalor nangta ym lah ruh ban kheiñ jem ïa kiwei pat kum ka NPP kaba khlaiñ bha ka vote ki garo.
Ha Rambrai Jyrngam ka jingïaleh kan long kaba ïakhaid, namar nalor u Bah K.P Pangniang na ka seng HSPDP kaba u la jop MLA teng, don ruh sa ka NPP kaba synshar ïa ka sorkar Jylla, ha kaba u Bah Kimfa Marbaniang u ba la jop MLA teng na ka Congress u ïoh bha ïa ka jingieit na ki paidbah nongkyndong.
Ka VPP kumba la tip paidbah ba u Bah Bony Lyngdoh kyrtong u dang thymmai sha ka rynsan politik. Hynrei ka lyer ka jur bha sha kane ka party namar ka jingtuid ki nongkyrshan na kylleng ka Constituency kumba long ha kiwei ki constituency.
Tangba, ha Rambrai u don pat sa u kyrtong shimet u ba baroh ki paidbah ki phai khmat bha mynta ka kynti na Rambrai. Uta u dei u bah Lurshai Kharbani u ba la paw bha ha ka jingïoh bun tam ki nongkyrshan na ki jaidbynriew garo kiba don ha khappud.
Ha Mawthadraishan Constituency ka jingïaleh kan long beit hapdeng ka VPP pyrshah ïa ka HSPDP. U Bah Powell Sohkhlet na ka VPP u dei u dap shynrang ba biang eh lada u jop na ka party VPP, kaba u la pynpaw ha ka por ba leit thep kyrteng ba ka dei ka party jong kiba duk ban shakri ïa kiba duk. Lada ki paidbah ki kyrshan kumba ki kyrshan ha ka elekshon MP, ka VPP kan jop suk.
Hynrei, don ruh sa ka HSPDP kaba ïakhun pyrshah tyngeh ha kaba u local MLA Bah Shakliar Warjri u la sei da ka para ban ïakhun ïa ka elekshon. Ha Mairang ruh u Bah John Basaïawmoit u don ka jingkyrmen kaba skhem bha mynta ka kynti ban jop na ka party VPP. Tangba kiwei pat ruh ki seng kum ka NPP, UDP ki long kiba khlaiñ bor khamtam haba ki don ha ka sorkar MDA.
Ha baroh hi ki jaka ne Constituency ha West Khasi Hills, lada ka pisa kam treikam, kamut ka VPP ka kham don lyer ban kheit ïa u soh jingjop.
