Shillong, Risaw 01 : U bah Shaniahlang Suchen President ka seng HANM jong ka War Jaintia u la ong ba ka jingïakynduh jong ki ïa u myntri kam poh ïing ka long halor ka jingdon ki shipai BSF ha shnong Amlarem kiba la pyndik ïa ki paidbah ïa ki kali bad ka leit ka wan.
U Bah Shaniah Suchen haba kren ha ki lad pathai khubor hadien ka jingïakynduh ïa u myntri kam poh ïing u la ong ba ha kane ka jingïakynduh u bah Lahkmen la ïathuh ba u la dep ban ïa kren bad Inspector General (IG) ki shipai BSF bad kumjuh bad u Director General ki pulit ka jylla halor kane ka jingeh ba ki paidbahki ïa kynduh.
Ha kane ka jing ïa kynduh na ka jingkren u myntri kam poh ïing kala paw shai ba kala biang palat hynrei kum ka seng kin ap ïa ka por ba ka jingïakren u myntri kam poh iing bad u IG ki shipai BSF ka lah ne em ban urlong lada ka jingïakren kam urlong kum ka seng kan shim noh da kawei ka lynti bad leh da ka kam.
Ha kine ki sngi kiba la leit noh ka jingshah thombor ki paibah nongshong shnong ka War Jaintia ha ki shipai BSF kala long sha ba palat, ha ka jingshisha ki BSF ki dei ban peit ïa ka rung ka mih jong ki khar Bangladesh, ha ka jaka ba kin peit ïa ki khar Bangladesh ki pynklumar shnong pynbna ïa ki paidbah nong India.
La ong ba wat ki paidbah kiba wan ïew na Jowai ki thied ïa ki khaw na ka bynta ban bam ha ïing, ïa ki jhur ki piat hynrei ha shiteng lynti ki shipai BSF kila pan jingthoh, kum ki GST bad ki kot ki sla ba ki thied nangno, ïa ki tiar kiba pyndonkam ha ïing ïoh nangno keiñ kita ki GST.
U nongïalam jong ka HANM u la kynnoh ba kine ki shipai BSF kila pyndik wat ïa ki khynnah ïa ki kynthei kiba leit sum, khamtam sha ba ki leit sha bri kwai bad ka don ka jingar tatien ba ïoh ki thombor ïa ki kynthei ha kane ka jingïakynduh kila pynbor ïa u myntri kam poh ïing ban shim khia ia kane kam.
Ha kane ka jingïakren la pynsngew ba ki shipai BSF kim dei ban pynwit ïa ki kali kiba kit ïa ki marbam mardih katei ka thaiñ, hynrei lada ki kwah ban talasi ïa ki kali ki dei ban leh ha khappud ym ba kin wan sha ki shnong ki thaw bad pan ïa ki kot kali, ka kamram jong ki kam dei ban peit ïa ki kali.
Ha kane ka jingïakynduh ka seng HANM kala ai por ïa ka sorkar hynniew sngi bad lada kane ka jingthom bor ka dang ïaid sha khmat naka liang jong ka seng bad ki paidbah kim ban se ban mih bad ban thombor ïa ki da ki paidbah, la ong u bah Shaniahlang.
U bah Lamphrang Kharbani u la bynrap lang haba kren lang u la ong ba kum ka seng HANM kim lah shuh ban shu sngap, ka kam jong ki BSF ban peit ïa ka jingwan rung ki khar Bangladesh kiba wan rung sha India.
ïa ka jingkem ïa ki nongtuh, kem mar khaïi beain kim ong ei ei namar ka dei ka kam jong ki hynrei ban pyndik ïa ki paidbah ka seng kam lah ban shu peit kai ïa kane ka jingleh ki shiapi BSF ban pyndik ïa ki paidbah.
