Lada u leh kam bymman dei ban pynshitom ym ban siat ïap kumba um dei u briew, ong u hymmen u Bah Roning

Pynursla Jymmang 06: Ka jingshah siat ïap ba jong u Bah Roning Nongkynrih ha ka ki Border Security Force (BSF), ka la wanrah ïa ka khubor ba kyndit bad bym lah ngeit ha ki ba ha ïing hasem jong u hadien ba ki la ïoh ïa kane ka khubor.
Haba u Mawphor ïakren bad u hymmen ar kmie jong u Bah Roning u Bah Magdiel Nongkynrih, u la ong ba lada ki bor ka aiñ ki lap ba u para jong u u leh ïa ki kam bymman ki don hok ban kem bad ai saja kat kum ka kyndon ai) ym ban shu siat ïap khlem da ai jingmaham la kumba um dei shuh u briew.
“Lada u leh kam bymman ki bor ka aiñ ki don hok ban kem bad pynshitom, lada u dei u lehnoh lehse u siat ïa ki BSF ki donhok ban siat ïap hynrei u para jong nga u don tang u shabi kali bad u bat steering hato don hok seh ban siat ïap ïa u, balei ym shym la shu kem ïa u ban ïoh ruh ka jingtian bishar pyrshah ïa ki kam bymman,” u la buh jingkylli,
“U dei u long kpa ïa ki arngut ki khun bad u kurim ïa ka tnga bad u pyrsa kurim bad hymmen bad para kynsi ha ka ïing ba u shongkha, bad nga lah ban ong ba ha la ka bor kaba u lah dei ma u uba pyndap ïa ka jingdonkam ha ïing ba u shongkha,” u la bynrap.
U la ong ruh ba ka jingkhlad jong u Bah Roning kan dei ka jingduh kaba khraw ïa ka ïing ba u shongkha ‘namar i kiaw, u hymmen kynsi bad ka para kynsi jong u ki dei kiba don jingduna dkhot met kiba u hap ban bsa nalor ka kurim bad i khun jong u bad ka jingduh ïa u kan dei ka jingïap thngan ym tang ïa ka lok bad ki khun hynrei ïa ka ïing ba u shongkha hi baroh kawei,’ u la ong.
“Nga ïohi ïa ka lawei kaba dum ïa ki khun bad ka ïing ban im khlem u kpa bad u nongpyndap pynbiang hynrei aiu shuh ngin lah leh ma ngi ïa kaba la jia hynrei tang kawei kaba ngi tip skhem ba ngin ïakhun haduh ban da ïoh ïa ka hok u para jong nga,” u la ong.
Haba kren bad u Bah Ribarskhem Nongkynrih uba don lang ha kane ka trok, u la ïathuh ba ka jinglait im jong u ruh ka dei namar mar sien ïohsngew ïa ka jingbthei kuli ‘nga thiah beit ha ka seat bad namar la bit snam ha ka met nga la ak kumba ïap ïoh lehse kin bteng ban siat biang ha kane ka kali hynrei ka jinglait im jong nga ka dei lehse ba u don u Blei bad u ïada ba ngan sakhi ïa ki jingjia kiba la jia,’ u la ong.
“Nga dei ka riew kynthei bad ka jingduh jong nga ïa u kurim ka dei ka lyngkor kaba khia ba ngan hap ban kit bad nga artaien ban lah ban kit kumba u la kit,” ong ka kurim u Bah Roning ka Kong Riplin Kmah.
“Kum ka ïing ngi kwah ban ïoh ka jingbishar ba hok bad ki dei ban siew bai lut ksan na ka tulop kito kiba shim ïa ka jingim jong u,” la pynpaw da kiba ha ïing hasem.