Lada ngi trei hi da ka kam lajong ngin sa lah ban beh ïa ki bar jylla: Samla Bahun Suïam

Shillong, Nohprah, 15: Ka jingpynlong tamasa da ka Sorkar Jylla ka long ka jingplie lynti ïa ki samla ha kane ka jylla ban ïoh kamai lyngba ka sengkam sengjam bad ban pyni ïa ki sap ba ki don kum ha ki rynsan pyninam.
Ka kynhun sengkam lajong kaba kyrteng ka Ïateilang Self Help Group kaba dang thymmai kaba la mih shakhmat ban pyni ïa ka sap shna umsoh ne ki jingdih pyngngad ha ka tamasa Winter Tales kaba la long ha Nanpolo, Shillong kaba la kut noh ha ka sngi Saitjaiñ. Kane ka kynhun kaba don 15 ngut ki dkhot ka la pyntyllun ïa ka kam bad ai jinghikai ïa ki samla kiba angnud ban nang kumno ban seng kam.
Ka Ïateilang SHG kaba la dep rejistar ha ka Sorkar Meghalaya bad ka la ïoh ruh ïa ka Food Licence ne FSSAI.
Hapdeng ka jingitynnad jong ka pung Nan Polok, ka tamasa Winter Tales ba san kaba la khring ïa kiba bun ki nongwan jngohkai kiba la sakhi ïa ka jingpyni ïa ka kolshor bad ka jingpynneh pynsah kum ka tamasa bapher bapher.
Ka tamasa ba la pynïaid da ka tnad Jngohkai Pyrthei ka la khring ïa ki samla ka jylla ban shong die ïa ki mar ki mata ba ki shna bad ki la pynmih katkum ka jingangnud bad ka jingtbit jong ki.
Ka kynhun Ïateilang ha ka jingïalam jong u President u Bah Banphi Shabong bad ka Secretary ka samla Bahun Suïam bad ka samla Memo Khyriem ki la die umsoh ha tamasa Winter Tales. Kane ka kynhun ka don ïa ka shnat treikam ha Lachumiere, Shillong ka dei kaba ju leit ban ïashim bynta ha ka jingpyni ïa ka kam shna umsoh ba laiphew jait kiba mih na ka jylla.
U Bah Shabong u ïathuh ka jingthmu ba la seng ïa ka SHG ka long ban ai kam bad ai jinghikai ïa ki samla bad ban plie lad ïa ka iew ka hat ban im jakpoh.
Ka samla Bahun Suïam ka la ïathuh ba ka jingthmu jong ka SHG ka dei na ka bynta jong ka kynhun ki bym ïohkam ba kin ieng ha la ki jong ki kjat ban seng kam da ka sap ka phong.
Kum ka samla ba khlem kam khlem jam hynrei ka don ïa ka thong ban thaw ïa ka lad sengkam bad ban pynlong iew ïa ki mar rep ka la mih shakhmat ban pynmih ïa ka umsoh kaba don ïa ka jingmad kaba shngiam.
Ka la ïathuh tang hadien katto katne bnai ba la seng kum ka kynhun ba trei minot ka la lah ban pynmih umsoh bad leit thied soh na iew bad na ki jaka rep.
Kaei kaba ki kwah kum ka kynhun ka long ba ki briew kin ai jingkyrshan ïa ki samla khlem kam, ki kwah ruh ïa ka Sorkar ban plie lad shuh shuh. Ka la ïathuh kum ka dkhot jong ka kynhun ka da thrang ban ïohi ïa ki paid nongrep ka jylla ban tur sha ka rep soh na ka bynta ka jingmyntoi kaba ki lah ban die sha ki nongshna ne pynmih umsoh.
Ka Samla Bahun ka bynrap, lada ki nongrep ki rep bad ki samla ki wan ban leh ïa ka kam lajong kan lah ban beh ïa ki bar jylla lyngba ka kam bad ban bat hi ïa ka iew ka hat bad ka khaïi ka pateng.
` Ha kawei ka liang ka samla Bahun ka ai khublei ïa ka Kong Jasmine Lyngdoh kaba la ai jingkyrshan ïa ka Ïateilang SHG ban pyndonkam ïa ka iing na ka bynta kane ka jingthmu kaba bha.
Ka samla Memo Khyriem kaba dei ka nongkyrshan ïa ki tiar ki tar mashin ban shna umsoh ka la ong ba ka sngewkmen haduh katta katta ban ïathuh ba kane ka kynhun ka la phaikhmat ruh sha ki samla ki bym donkam ba kin long ki nongsengkam.