Shillong, Risaw, 26: Ka Khasi Students Union (KSU) ka la ong ba lada ka Jylla Meghalaya ka don la ka jong ka Medical College kan ym kyrduh doktor satia.
“Ka jingslem ban pynurlong ïa ka Medical College ha ka jylla ka la wanrah ïa shibun ki jingeh bad ki jingduhnong ha kiba bun ki liang ha kaba ïa dei bad ka sumar sukher, ka koit ka khiah ha jylla. Ka jingud jingnam ki bor pynïaid Hospital, ki paidbah bad ki bor Sorkar na ka por sha ka por halor ka jingduna ki doktor khamtam ki Health Specialists ka dei eh namarba ka jylla wat hadien 50 snem ruh kam pat lah ban pynkha ïa la ka jong ka Medical College bad ka Engineering College kaba pyni ïa ka jingbym shimkhia naduh mynshwa haduh mynta da ki Sorkar ha kaba ïa dei bad ka koit ka khiah, ka pule ka puthi,’ ong ka KSU ha u kyrwoh ba la phah sha ki lad pathai khubor.
“Katkum ka khubor ba la mih ha kawei na ki thup khubor ka Jylla ha ka 23 tarik, Risaw mynta u snem, la bynniaw da uwei u nongmihkhmat jong kawei ka seng saiñpyrthei ba ka daw ba ki Health Specialists kiba nabar ki phet lut na Meghalayaka dei namar ba kim ïoh ban thied jaka. Shuh shuh u la dawa ba dei ban shah noh ïa ki doctor bar jylla ban thied jaka puta ha Meghalaya khnang ba kin shongduh bad trei ha Jylla. Kane ka jingkren ka jong une u nongmihkhmat ka long kaba jyndong shikatdei eh ha kat ka kyrdan ka jong u,” la ong ka Seng.
“Ka KSU ka sngew ba ka jingduna ki Health Specialist ka dei na ka daw ka jingbymdon la ka jong ka Medical College ha la ka jylla ka ban pynïaid hi da ka Sorkar Jylla. Jin lada ngi don la ka jong ka Medical College naduh mynshwa ka mut katta, ka jylla kan ym duna, hynrei kan pahuh ki Health Specialists kiba dei ki trai ri trai muluk ka jylla ki ban shakri shi lynter ha la ka Jylla,” la kynthoh ka Seng bad bynrap, “kane pat kan ïarap shikatdei eh ïa ki paidbah nongshong shnong ka jylla ha ka liang ka sumar sukher ha kaba kin ym donkam ban leit phah sumar shabar ka ban ktah pat ïa ka ïoh ka kot ka jong ki khamtam kito kiba duna ha ka kamai kajih.”
“Lada ka sorkar kan shu ailad lut ïa ki doktor bar jylla ban kamai na jylla jong ngi bad ruh sa ka ïoh thied jaka ka mut ka la pynïap ïa ka jingtrei shitom ki nongïakhun Hill State kum u Bah Martin N. Majaw bad kiwei kiba la trei borbah lyngba ka jingïohi jngai jong ki ban pynkha ïa ka Meghalaya Land Transfer Act kaba long ka atiar ba khlaiñ haduh mynta ban ïada ïa ki jaidbynriew ritpaid Khasi bad Garo na ka jingshah tyllep ha kiba nabar,” bynrap ka KSU.
Ka KSU ka dawa ba ym dei shuh ban pynsahteng ïa ka jingplie ïa ka Shillong Medical College bad maham ruh ba ym bit da leilei ruh em ban pyntlot ne pyndkoh ïa ka jingtreikam jong ka Meghalaya Land Transfer Act.
