Lada kiba donkti ïakren ïasuk ki shah pyndik mano ban shaniah shuh ïa ka sorkar : HNLC

Shillong, Lber 11: Ka Seng HNLC ka la kyntait ba u Bah Tarson Lymba udei u dkhot ka Seng, hynrei ka la long ba une u dkhot ka HNYF udei uba ïadon bynta ha ka jingïakren ïasuk ka Seng bad ki bor sorkar, namar u ju leit bud ïa u Bah Sadon Blah, uba long u Ksiang jong ka Seng (HNLC) ha ka jingïakren ïasuk bad ki bor sorkar.
Ka kyrwoh ba la phah da u Bah Saiñkupar Nongtraw, General Secretary ka Seng uba long ruh u Publicity Secretary, la ong ba ka Seng ka pynrem jur ïa kane ka jingkem ki Pulit ïa u Bah Tarson, u bym dei satia u dkhot ne u nongkyshan ka HNLC.
Ka HNC, ka kynnoh ba kane kadei tang ka bui treikam kaba ju leh da ki Pulit ban kem pathar ïano ïano haba kam lap ïa ki briew kiba donkti shisha ha ka jingjia. “Lada ki briew kiba donkti ha ka jingïakren ïasuk ki shah pyndik ha ki Pulit, mano ban dang shaniah shuh ha ki jingtreikam ki bor sorkar lada ka HNLC ka wan bian na ka bynta ka jingïakren ïasuk?”, la ong u Bah Saiñkupar, da kaba bynrap ruh ba ka jingshisha ka paw na ka jingpharep bad siat ïap ka sorkar ïa u Bah Cherish uba la thmu ban wanrah jingsuk ha ka jylla.
Ka Seng ka pynrem jur ruh ïa ki nongmihkhmat paidbah ka jylla kibym shym la lah ban ïada ïa ka jingsynshar paidbah ha ka Bri u Hynñiewtrep, hynrei kiba la pynlong pynban ïa ka ri kum ka ri jong ki briew kiba riewspah bad ba la synshar ruh da ki briew kiba heh spah. “Kine ki la long tang ki puppet ne ki tyngshop jong ka sorkar India”, la ong u Bah Saiñkupar.
Ha kaba ïadei pat bad ka jingkem ki Pulit ïa u Ebakordor Nongpluh, ka HNLC ka ong ba udei u nongsyntiat ne u Informer jong ki Pulit.
Ka kyrwoh ka ong ruh ba ka Seng kam pyrshah ïa ka jingsuk, hynrei ka jingsuk kam dei ban wan pat da ka lynti jong ka jingthombor bad ka jingbanbeiñ. U nongïalam ka HNLC, u la ong ba ka sorkar kadei ka nongban beiñ bad ka HNLC kadei kaba shah ban beiñ. Hynrei lada ka ri ne ki paidbah ki shah knieh noh ka khyndew ka shyiap shano kan wan kata ka jingsuk. U Bah Saiñkupar, u la ong ruh ba ka India mynta la 76 snem kam shym la don satia ha ka jingsuk bad ka jingsuk kan nym wanrah ruh katba ka dang don ka jingsynshar leh shiliang khmat, ka jingthombor, ka jingnoh shiliang ka aiñ ka jingshet kylla bad ka jingsynshar donbor.
Shuh shuh ka Seng ka la ong ba ka jingsynshar ha ka ri mynta ka dap tang da ka briew kiba thombor, ki nongpyniap ïa uba rit baria, ki riew thok riew shukor bad ki riewsniew, ha kaba na ka por sha ka por ki bor sorkar ki pynkheiñ ïa ka jingïateh kular bad ki Hima Khasi. Nalor kata la thombor bad ñion beiñ ïa ki nongïalam Hynñiewtrep kiba ka sorkar kam sngewtynnad satia ïa ki.
Ka Seng ka ong ruh ba ki bor sorkar ki la donkti ha kaba pynïap klep ïa ki nongïalam lyngba ki fake encounter ne kata ka jingïasiat markylliang ba shu thok. “Phi la pynïap ïa u Bah Cherish, phi la rahbor ïa u Sib Sing Syiem, phi la ñion ïa u Wickliffe Syiem da kaba pynbor ïa u ba un moih noh na la ka jong ka It ka Hima. Phi lah ban ong ba ngin tieng da kaba leh kumne, hynrei ngim tieng bad ngin ym kynran dien, hynrei ngin tur beit shakhmat”, la ong ka Kyrwoh ba la phah bad soi da u Bah Saiñkupar Nongtraw.