Lada ki thrang ban rung sha Meghalaya wat ka Sorkar Assam ruh ka kloi ban aiti ïa ki jaka: Conrad

Jowai, Nohprah 03 : U Myntri Rangbah ka sorkar Jylla u Conrad K. Sangma ha ka jingkren bad ki lad pathai khubor ula pynsngew da kaba ong lada ki nongshong shnong kiba don ha khappud bad ka Assam ki thrang ban rung sha Meghalaya wat na ka liang jong ka sorkar Assam ruh ka kloi ban aiti ïa ki jaka sha ka Meghalaya.
Shuh shuh ula pynshai da kaba ong lada ka sorkar jylla kam don ïa ka mon ban shim khia ïa kane ka long kaba eh bha ban pynbeit ïa u pud u sam hapdeng kine ki ar jylla, hynrei dei lyngba kane ka sorkar hapoh ka jingialam ka NPP la dep ban ïasoi noh ïa ka MoU ban pynbeit pud ha ki 6 tylli ki jaka bad kaba sah sa 6 tylli.
“Kila don ki jaka khappud bala dep pynbeit khamtam kiba don jingmut ban rung sha Meghalaya wat ïa ki skul ba la pynïaid da ka sorkar Assam, na ka liang ki nonghikai kiba mih noh na kitei ki jaka bad kane ka dei ka mon jong ka jingtrei kam jong kane ka sorkar kaba la sahteng la 45 snem tam mynta na ka bynta kitei jaka khappud” ong Myntri Rangbah.
Halor kane u Myntri Rangbha ula pyntikna ba ki paidbah ka jylla sa shisien kin sa ai biang ïa ka jingkyrshan kaba pura ïa kane ka sorkar ha kane ka snem ban wan jong ka Election 2023.
Shuh shuh ula pyntikna ba ka shnong Mukroh ka dang dei hapoh ka Jylla ula pyntikan ruh ba namar ba dang bun ki kam ba dei ban pyndep ha kine ki sngi, ula kular ban leit jngoh ïa katei ka jaka khappud ha kawei pat ka sngi ha ryngkat ki myntri sorkar.