Lada ka kaiphod ka pynpaw ïa ka jingleh bym suidñiew, yn pynshitom ïa kiba donkti: Ampareen

Shillong, Jylliew, 17: Ka Myntri ka Koit ka Khiah ka Sorkar Jylla ka Dr. Ampareen Lyngdoh ha ka sngi Baar ka la ong ba ka jingpynshitom ka la ap lypa ïa ki nongtrei lada ki kaiphod ki pynpaw ba ka jingïap ba dang shen jong kawei ka longkmie ba armet ha Maternal and Child Health Hospital ha Jowai, West Jaintia Hills District ka dei na ka daw ka ‘jingbymsuidniew jong ki nongtrei.”
“Ngi dang ap ïa ka Committee ban aiti ïa ka kaiphod sha ka tnat. Lada ka don ka jingleh bym suidniew ïa ka kam, kito kiba hap ban shim ïa ka jingkitkhlieh kin mad ïa ka jingshah pynshitom,” la ong ka Dr. Ampareen ha ka jingïakren bad ki lad pathai khubor.
Kum ban shu pyntip hangneba ka Kong Pynche Bareh na ka shnong Jalaphet ka la khladnoh ha ka 4 tarik, Jylliew.
Ka Dr. Ampareen ka la ong ba ki bahaïing hasem jong ka Kong Bareh ki la ujor sha ka Iingbishar bad sha ka Meghalaya Human Rights Commission (MHRC) kiba la pan ïa ka kaiphod kaba bniah halor kane ka jingjia.
“Ngin ha ban ap ïa ka sngi shong bishar, ngin hap ban ap bad ban phah ïa ka jubab jong ngi sha ka MHRC bad ngin sa peit kumno ka kam kan ïaid nangne shakhmat,” ka la bynrap.
Ka Myntri ka la pyntip ba ka la thaw ïa ka Committee, kaba la pynkhreh ïa ki kaiphod bapher bapher ban phah sha ki tnat bapher bapher, kiba ki bahaiing hasem ki la ujor.
“Ngi dap da ka jingsngewsih kaba khraw halor kane ka jingjia kaba la jia bad kum ka jylla ngi hap ban pynthikna ba kum kine ki jingjia kim dei shuh ban dang jia ha ki sngi ki ban dang wan,” ka la ong.
“Ka sorkar ka la ïakhun pyrshah ïa ka jingïap jong ki longkmie ba dang pun khun lyngba ki skhim bapher bapher bad ki jingïarap bapher bapher,” la ong ka Dr. Ampareen.