Lada jop ma ngi, phin ïoh bad MDC bad MLA bad ruh u Dy. CM, ong u kyrtong NPP ha Nongkynrih
Shillong, Rymphang 09 : U kyrtong ka National People’s Party na Langkyrdem – Laitkroh constituency, Bah Rahbok Tynsong u la ong ba kum u kyrtong um kwah ban kular ïa ka bneng ka khyndew tang ban ïoh ïa ka vote ha kane ka elekshon MDC.
Haba kren ha ka jingïalang ïalap elekshon kaba long ha Nongkynrih ha ka janmiet sngi Saitjain, u kyrtong u la ong ba ka jingkular kaba u lah ban ai sha ki paidbah ka long ban donlang ha ka khia ka shon khamtam eh haba ki paidbah ki kynduh mawsiang bad kim donlad shuh shano shano ban phai.
“Kane ka dei ka kabu ksiar ïa ka Raid Nongkynrih baroh kawei namar phin ym ïoh shuh kum kane ka elekshon. Lada ngi poi sha ka thong phin sa ïoh ym tang ïa u MDC hynrei phi ïoh lang ïa u MLA bad kumjuh ïa u Symbud Myntri Rangbah ruh,” la bynrap biang u Bah Rahbok.
Kane ka jingkren jong u, ka dei namar u MLA ba dei na ka thaiñ, Bah Gavin Mylliem u dei na kajuh ka party kaba u mih ban aireng ha kane ka elekshon MDC.
Shuh shuh u la kyntu jur ïa ki paidbah ba kim dei satia ban shoh biej ha kito kiba pyrta ieid jaidbynriew hynrei ba kin da puson bad da bishar bniah bha da kaba buh hakhmat ïa ki khun ki kti bad ka pateng kaban sa wan.
“Pyrkhat ïa ki khun ki kti shano kin poi hadien, dei na kane ka daw ngi wan ban kyrpad bad ruh ban pynkynmaw ba ka sorkar NPP kala leh shibun na bynta jongphi lyngba i Maduh Prestone bad i Bah Gavin. Ngin ïai bteng ban leh ïa ki kam ba bha lada phi ai biang ïa ka jingjop ha kane ka elekshon MDC,” u la bynrap biang.
Ha kane ka janmiet la donlang ruh u State President ka Party, Bah Prestone Tynsong ba dei ruh u Symbud Myntri Rangbah, nangta u MLA ka thaiñ Bah Gavin Mylliem ba dei ruh u District President, nangta u General Secretary ka NPP East Khasi Hills Bah Aibor Tynsong, ki nongïalam jong ka NPYF bad ruh ki longkmie NPP.
Wat hapdeng ka jingkhriat tasam jong ka Tlang hynrei ki paidbah ki shong beit hajuh da kaba ïalum sawdong ka ding naduh kaba sdang tad haduh ban da wai ka jingïalang.
Na kane ka constituency ki don haduh 6 ngut ki kyrtong kiba aireng ha kane ka elekshon kaban long ha ka 21tarik mynta u bnai.