K a jingthmu jong ka sorkar jylla ban ïakren ban tyngkhap ïa ka kynja kyndon ba ïasyriem kum ka ILP ha ka aiñ Immigration and Foreigner Act (IFA) 2025 ha ka jaka ban dawa beit ka Inner Line Permit (ILP) hangne ha Meghalaya ka la pynkhih bitar ïa kiba bun ki seng bhalang bad wat ïa ki riew paidbah ruh namar ki ong kane ka aiñ ka ïapher bha na ka ILP.
Ngi la tip shai kdar ba ïa ka ILP la wanrah bad pyntreikam ha kine ki jylla kane ka thaiñ shatei lam mihngi da ka sorkar phareng ban pynthikna ban ïada ïa ka jingwantuid kiwei ki jaidbynriew na ri thor ka India sha kine ki jaka ba sah ki riewlum rit paid bad kane ka long ban pynthikna ruh ban ïada ïa ki na ka jingshah tyllep ha kiwei ki jaidbynriew heh paid
Kiba bun ba lang ki la buh jingkylli halor kane ka jingthmu ka sorkar ba kumno ka thmu ban pyntreikam da ka aiñ IFA. “ Ka sorkar pdeng ha u 2025 ka la pynmih jingpynbna ban kynthup ïa ka Sikkim, Arunachal Pradesh, Mizoram, Nagaland bad Manipur kum kita ki jylla ban ïoh jingïada ne ki Protected Areas bad kane ka long kat kum ka Section 2(s) bad (q) jong katei ka ain IFA 2025. Kat kum ba ka paw imat ka sorkar MDA ka don ka jingthmu ban kyrpad ïa ka sorkar pdeng ba kan kynthup ruh ïa ka Meghalaya kum kata ka Protected Area kumba ka paw na ka jingkren jongu Myntri Rangbah
Ka ILP bad ka IFA ki ïapher bha, ka ILP ka khanglad ban wan rung laitluid ki briew na kiwei ki jylla sha ka jylla Meghalaya katba ka IFA pat ka khanglad ïa ka jingïoh wan rung ki mynder ri shapoh India. Kumta ka IFA kam dei ban ïa bujli bad ka ILP. Hato ka sorkar ka la shu kular thok halor kane ka kam namar la dep mynjur da kawei ka sur halor ka Resolution hapoh ka ïing Dorbar Thawaiñ ka jylla ban pyntreikam ïa ka ILP ha kane ka jylla kaba dei naduh ka por jongka sorkar MDA I. La kynthoh pyrshah ruh halor ka jingweng ïa ka kyntien Khasi bad Jaintia na ka Preamble jongka Bengal Eastern Frontier Regulation 1873 ha u snem 2019.
La shu ïalam bakla ïa ki paid nongshong shnong jong ka jylla halor ka ILP. Mynta ka paw shai bad ka Resolution ban pyntreikam ïa ka ILP ha ka jylla naduh ka por ka sorkar MDA 1 ka dei ka kam ba la shu thok shu jler ïa ki paidbah namar ym pat i don dak ban pyntreikam da ka sorkar pdeng ïa ka ILP ha ka jylla Meghalaya.
Ngi kwah ban pynkynmaw ïa ka sorkar NDA ba ka la weng noh ïa ka kyntien Khasi bad Jaintia na ka preamble jongka Bengal Eastern Frontier Regulation 1873 naduh u snem 2019 bad naduh katei ka por haduh mynta ym pat ju ïoh sngew ïa ki jingkynthoh ba kumno kumno ruh da ka sorkar MDA halor kane. Ka long kaei kaei kaba bha ban tip ba ïa ka kyntien Khasi bad Jaintia la kynthup ha ka Preamble jongka BEFR 1873 bad hadien ba la pynmih ïa ka jingpynbna ha ka Gazetted jongka sorkar India ka ILP ka la treikam ha ka jingshisha ha Khasi bad Jaintia. Mynta pat kam long shuh kumta namar ïa kitei ki kyntien la weng noh ha u 2019 kaba long beaiñ bad lah ruh ban ujor sha ki ïing bishar ruh. Ka Meghalaya ka dei hok ban ïoh ïa ka ILP bad haba la weng ïa ka kyntien Khasi bad Jaintia dei ban pynrung da ka kyntien Meghalaya ha ka preamble jongka BEFR 1873 kum ka nuksa ïa ka Manipur la kynthup ha u 2019 ha ka Preamble jongka BEFR 1873. Ka jingïasaid jong ngi ka long lada ïa ka Arunachal Pradesh, Mizoram, Nagaland bad Manipur lah ban ai ILP balei ym lah ïa ka Meghalaya. Kumta ka long kaba dei ban ong ba ka jingpyntreikam ïa ka ILP kam long pyrshah ïa ka Article 19 jongka Riti Synshar ka Ri namar balei ha kiwei kiwei ki jylla kane ka thaiñ la pyntreikam ïa ka ILP.
Lada shimiet shimiet ka sorkar NDA ka lah ban ai ILP ïa ka Manipur tang namar ba ka bat hi ïa ka jingsynshar ha katei ka jylla kan eh aiu keiñ ïa ka BJP ban ai ha Meghalaya ruh.
