Ki nongdie madan ha Khyndailad, ki la ïa pyni bor pyrshah ïa ki nongtrei jong ka Municipal, namar ba ka jingthmu, ka long ban pyn kynriah ïa ki da ka bor, na ki rud surok jong katei ka ïew bad ban rah sha ka ïew jong ka MUDA, kaba don hangtei hi ha syndah jong katei ka jaka kaba ki ju die manla ka Sngi.
Haba peit bha halor kane ka mat, la ïohi ïa ki hukum ba la pynmih ka Meghalaya High Court na ka por sha ka por, na ka bynta ban nym shah ïa ki briew, kiba pynkhapngiah ïa ki surok bad katei ka kynthup, naduh ki kali kiba ïeng thurmur, ba kin shah daiñ kuna kaba heh, kumjuh ïa ki nongdie madan ruh; hynrei kat haduh mynta, ngim ju ïohi, ïa u myntri ka sorkar jylla, u ba peit ïa ka tnat pynroi sor, ba un pynrung sha Secreteriat, ïa kitei ki para ri ban kylli jingmut na ki, halor ka jingkhapngiah ki surok ha Khyndailad, ha Ïewduh bad sha kiwei de ki jaka bad hangtei ka wan ka mat, kaba donkam bha bad kata ka long, ba lada ki kharmetor, ki rung Secreteriat jan man u bnai ha u snem 2024, kumta kan don jingeh aïu, ïa ki arngut ki heh jabieng jong kane ka sorkar MDA, kiba long ki symbud myntri rangbah, ba kin lum ïa ki nongdie madan kiba pli, kumba ki la pynlut shibun ka por jong ki, ban ïakren ïa ka sobjek, ka bym poi shaei shaei ruh bad ki kharmetor.
Ban shu hukum ïa ki nongdie madan ba kin mih noh mynta mynta na surok bah Khyndailad, ka long kaba sngewsuk shibun bha ha uba donbor ban hukum, hynrei haw shu pyrkhat ba kan jia kumno, lada uno uno u nongtrei jong ka Municipal, un shah beh mar mar na ka kam jong u, khlem da ai ïa kino kino ki daw kiba biang bad hangne ruh, kam dei kaba eh ba ki nongdie madan, kin mih na katei ka jaka, wat lada kin shong khop noh ha Ïing shirta jingim ruh; hynrei ka wan ka jingkylli, la ka sorkar ka don ne em ïa kano kano ka lad kaba kham bha ban ïarap ba ki khun ki tnga jong ki, ba kin lait na ka leit tuh ne leit khrong bad hangne ruh ka wan ka mat, ba lada ki kharmetor ki ïoh ïa ka Ïing kaba hynñiew mala sha European ward, hynrei kim treh, kumta balei ba kam don ka jing ïapynbeit bad ki nongdie madan, ba kin jied ïa ka jaka kaba ki sngew ïahab bad ban ai kylluid ïa ka por bad ka pisa kumba leh ïa ki kharmetor ba kin pynkhreh ïa ki dukan thymmai.
Kumba la kren haneng, kumta ka long kaba donkam ïa u Myntri Pynroi Sor ba un pyni ïa la ka jong ka jingsngewrit bad ka jingjem mynsiem, ba un lum ïa kitei ki para ri ha Khyndailad bad ba un kylli shwa ïa ki jingeh ba ki don, ha katei ka kam shong madan bad ïa kaei ka lad ka lynti, ba ka sorkar ka lah ban leh, na ka bynta jong ki bad ha kajuh ka por, ïa ka jaka kaba biang tam, ba kin kynriah noh, lada ka dei ba kin mih na ki rud surok ha Khyndailad bad lada ka don katei ka jingïakren kaba shai, ngi kyrmen ba ym don kawei ruh ka nongdie madan, ka ban kwah ban shah slap baroh shisngi hangtei ha surok, lane ban shah khriat, tang shu la wan ka tlang, lane ban shah thang ha ka sngi, ha ka por pyr-em; hynrei kumba ka long mynta la shu tan jubor ïa ki briew, kum ïa ki mrad, khlem da pyrkhat ba kin bsa kumno ïa la ki khun ki kti, ïa la ki kmie ki kpa lane ïa ki bahaïing ha sem, kiba pang ba shitom bad kiba am hi khait ban trei shitom baroh shisngi, na ka bynta ban ïoh thied khaw pat ynda miet ban pynbiang ïa kito kiba ap ha ïing, ba kin ïoh pyndap ïa la ka kpoh, na kitei kiba shong madan ha Khyndailad.
Ha kane ka jingkyndang bad talasi ïa ki certificate of vending da ka Tnat Shillong Municipal Board kaba la long manla ka Sngi ka la pynrit mynsiem ïa kiba bun kiba die madan hynrei ki la ïai pyneh hi triang ban shong beit ban die ïa ki jingdie jong ki ha Khyndailad namar ki sngewthuh ba la da ki mih na kane ka jaka kan ktah ïa u khiewja jong ki.
Haoid wat la ka Sorkar ka la kohnguh ïa ki hukum jong ka Meghalaya High Court ban pynbiang ïa ki jaka jong kiba die madan ha shwa ban pynkynriah ïa ki napoh khyndailad hynrei kumba ka long mynta bad kumba la ïohi manla ka Sngi kine kiba die madan kim kwah satia ban mih noh na katei ka jaka halor kiba bun ki daw ba ki la pynpaw na ka por sha ka por bad dei halor kane ba ka Sorkar ka donkam ban khot ïakren ïa ki ban sngewthuh shai kaei ka jingmut jong ki kaba ki don.
Kaei kaba donkam mynta ka long ba ka sorkar ka dei ban phai khmat ruh sha kine kiba shong madan ba ki ruh ki dei ban ïatreilang bad ka sorkar ïa ka jingthmu jong ka ban pynkylluid bad ban pynbha briew ïa ka Khyndailad khnang ba kan lah ban khring khambun ïa ki briew kiba wan jngohkai na shabar ka jylla ha kaba kane, ha kaba khatduh kan pynïohnong ruh ïa ka jylla ha ka kam ka khajna bad kiwei ki lad ki lynti.
