Lada dang jop ki Party ba thaw ïa ka MDA, ki jingtohkit kim poi shano shano ruh:VPP

Shillong, Nohprah 09: Ka Seng VPP lyngba u Nongaiktien jong ka, u Dr. Batskhem Myrboh, kala ong ba ki jingtohkit ba shisha ïa ki kam bamsap bad kiwei kiwei de ki jingtohkit ïa ki jingjia ha jylla kin urlong tang lada wan da kawei pat ka sorkar hadien ka elekshon MLA 2023.
Ha ka kyrwoh ba la pyllait mynta ka sngi, u Dr. Myrboh, u la ong ba katba dang thaw sorkar hi ki Party kiba don mynta ha ka MDA, kata ka NPP, UDP, BJP, PDF, HSPDP bad kiwei kiwei, ki jingtohkit halor ki kam bamsap kiba jyllei ha ka jylla ha kine ki sngi, ki jingtohkit ba la thung da kane ka sorkar kin nym poi shano shano ruh, hynrei kin shu long tang ka jingpyllutkai ïa ka pisa paidbah.
U Dr. Myrboh u la ong ba ka ju long ka rukom ba ki jingtohkit ba thung hi da ka sorkar kin nym pynshitom ïa kiba don ha ka sorkar bad kumta ka jingïadawa ka jingïathnum ban pynshitom ïa kiba donkti ha ki kam bamsap, ha ki kam sniew kan shu long lehnohei namar ba kita kiba donkti ha ki kam bamsap bad kiwei de ki kam sniew kin shu ïaid sahuh khlem pyrwa ei ei.
Kumta u kyntu ïa ki paidbah ba lada ki kwah ban ïohi ba ki jingtohkit bamsap kin treikam shisha dei ban kyntait noh ïa kine ki Party baroh kiba don ha ka sorkar MDA ha ka elekshon MLA 2023 bad ban jied da kiwei pat ki Party ban wanrah da kawei pat ka sorkar hadien kane ka elekshon.