New Delhi, Nohprah 09: Ka Dorbar Rajya Sabha mynta ka sngi, ka la pdiang ïa ka jingwanrah ïa ka Bill halor ka jingpyntreikam ïa ka Uniform Civil Code lane ka Bill kaban pynduh noh ïa ki Aiñ jong ki Niam kaba kaba ïadei bad ka jingshong kurim bad kiwei kiwei.
Ïa kane ka Bill la wanrah da ka Private Member’s Bill lyngba u Kirodi Lal Meena, u MP ka BJP na Rajasthan. Kane ka jingwanrah ïa kane ka Bill ka la wanrah ka jingpyrshah kaba jur na kiwei pat ki MP jong kane ka ïingdorbar, ha kaba ki la hylla ki la pynthut ïa ka jingïashong dorbar. Hynrei u Shongknor ka ïing Dorbar, u Jagdeep Dhankar, u la pynlong da ka jingïathep vote bad lyngba kane ka jingïathep vote kiba kyrshan ban wanrah ïa ka Bill ki long 63 ngut bad kiba pyrshah ki long 23 ngut. Ym shym la ïoh jingtip la u MP ka jylla sha Rajya Sabha, u Dr. WR Kharlukhi u kyrshan ne u pyrshah ban wanrah ïa kane ka Bill.
Hadien ba la ïoh jingbit ban wanrah, ïa kane ka Private Member’s Bill yn buh kun ka Pending Bill bad hadien kan sa don biang ka jingïajied napdeng ki Private Member’s Bill bad lada kane ka Bill ka shah jied kan sa don ka jingïatai ha Rajya Sabha ha ka sien shong dorbar kaba hadien.
Lah ban kdew hangne ruh ba ka Seng BJP lyngba u Myntri Rangbah Duh u Narendra Modi kala jopkput ha ka elekshon MLA ha Gujarat dei halor ka nongrim ban wanrah bad pyntreikam ïa ka Uniform Civil Code ha baroh kawei ka ri India.
