Lada ai jait ha u Shynrang ka jaitbynriew kan sa jah rngai noh, ong u Bah D. Lyngdoh

Nongstoiñ, Jymmang 27: “Ka jingpynksan jong ki nongïalam ka Synkhong Rympei Thymmai ba ka jing ai jait sha u shynrang ka long kaba bha, ka dei ka jingpynksan khleh biej jong kiba stad”, ong u bah D.Lyngdoh u rangbah kur jong ka jait Lyngdoh Nonglyngkien.
Ha kaba ïadei bad katei ka phang utei u rangbah kur u la ong ba ka long kaei kaei ka bym lah ban pdiang ïa katei ka jingpynksan khlem nongrim jong ki nongïalam ka SRT. Namar lada ai jait ha u shynrang ka long thik kumba u shynrang u knieh noh ïa ka hok jong ka kiaw kurim jong u.
Nalor kata lada u khun u ai jait ha u kpa, lada jia ba u khlad noh ha ka por ba u la don khun uwei ne ar ngut bad lada ka lok jong u ba la khlad ka shong lok da uwei pat u bym dei na kajuh ka jait, lada ka ïoh khun biang sa ar ne lai n gut ki shi para trai ki khun jong ka ki dei shi para trai hynrei ka jait pat kam dei kajuh.
U la ong ruh ba naduh ba ka jaitbynriew Khasi kam pat ithuh ïa ki dak thoh ka jingkheiñ jait ka dei beit sha ka kmie. Ka jingai jait ha ka kmie ka dei ka jingpynkup bor kaba kongsan tam ïa ka kynthei bad lada yn pynkylla da kaba kheiñ jait ha u shynrang, ka jingpynkup bor ba kyrpang da ka aiñ ïa ki kynthei ka long lehnoh ei.
U la ong ruh ba wat lada pynshong nongrim na ka jingthoh ka Bible ruh, ka kren shai kdar ba u shynrang un iehnoh ïa la ka kmie bad u kpa bad u dei ban ïaineh bad la ka tnga bad kam shym la kdew ne ong pat ba ka kynthei ka dei ban iehnoh ïala ka kmie bad u kpa bad kan leit shong ha ïng u tnga. U ong ba lada ka jaitbynriew Khasi kan ai jait ha u shynrang, tang hadien shiphew snem ka jaitbynriew ka la jah rngai shi syndon na kane ka sla pyrthei.
U la ong ruh ba ki don ki jingshisha wat ha ka imlang sahlang ba lada ki don kino kino ki jingïakajia, lada leit tur da ki shynrang ka jingklumar kan kham khraw shuh shuh. Hynrei lada ki longkmie ki tur sha khmat wat ki riew runar ruh kim nud satia ban ktah kti ïa ki longkmie.
Ha kaba ïdei bad katei ka mat la ïoh ban twad jingmut ruh na shibun ki longkmie na kylleng ki shnong, ha kaba ki la pynpaw ïa ka jingbym sngew ïahap ïa ka jingpynksan ban kheiñ jait ha u shynrang. Ki a pynpaw ruh ïa ka jingbitar ba lada ka jing dawa ban shim jait ha u shynrang kan wan bsuh khlieh ha West Khasi Hills, kin ym ai lad bad kin mih paitbah ha surok ban pyrshah.
Ka kong A.Kharsyntiew nongïalam ka Synjuk Seng Longkmie Nongstoiñ Area, ka la ong ba lada ki baroh longkmie na West Khasi Hills ki sngewkhia halor katei ka kam, ka por ka la dei ban dawa na ka District Council ba kan nang pynskhem shuh shuh ïa ki aiñ kiba ïadei bad ka longkur long jait jong ka jaitbynriew Khasi. Namar ka jingdon jong ki nongpynksan ban shim jait ha u shynrang, ka dei ka phongrai ka ban wan rah ïa ka sang ka byrsieh ha ka jaitbynriew baroh kawei.