Shillong, Nailar, 25: Mynta ka lah thikna ba u Bah Alexander Hek un hap ban ïakhun pyrshah ïa u Bah Rocky Hek, lada u kwah ban jop biang ïa ka elekshon MLA ha u snem 2023.
Kane ka long hadien ba ka National Peoples Party (NPP) ha ka sngi Palei ka la pynbna ïa u Bah Rocky Hek kum u Kyrtong ban aireng pyrshah ïa u MLA jong ka BJP na Pynthorumkhrah Constituency u Bah Alexander L. Hek.
U Bah Rocky Hek u dei u pyrsa jong u Bah AL Hek uba la mih noh na ka BJP dang shen ban pynïasoh ïalade bad ka NPP mynta ka sngi khnang ban ïakhun pyrshah ïa la u jong u Mama ha ka Elekshon sha ka Ingdorbar Thawaiñ ka Jylla ka ban sa long ha u snem 2023.
Ïa u Bah Rocky Hek bad ïa ki nongbud jong u, la pdiang burom da u National President ka NPP u Conrad Kongkal Sangma ha ryngkat ka jingsakhi lang jong u Symbud Myntri Rangbah u Bah Prestone Tyngsong, u Myntri ka sorkar u James K Sangma lem bad kiwei kiwei de ki MLA jong ka NPP.
Namarba ka Pynthorumkhrah Constituency ka dei ka constituency kaba ïashong khleh jaitbynriew, u Conrad Sangma haba ai jingkren ha kane ka sngi, u la kren ruh da ka ktien Hindi khnang ban pynsngewthuh ïa ki paidbah ïa ki nongrim treikam bad ïa ki thong jong ka party.
U Bah Rocky Hek haba kren ha kane ka jingïalang u la pan jingkyrshan na ki paidbah nongshong shnong ka Pynthorumkhrah Constituency ba kin pynjop donburom ïa u ha ka Elekshon ka ban sa long da kaba kular ruh ban peit ïa ka bha ka miat bad ka jingdonkam jong ka shnong ka thaw baroh kawei.
