Shillong, Lber 03: Ka Meghalaya Football Association [MFA] ka dang trei shitom ban pynkhreh ïa ka JN Stadium bad ka jaka kilanmet ha NEHU na ka bynta ki ar tylli ki jingïalehkai phutbol bar ri (International Match) jong ki shynrang kiba ka nongbah Shillong kan pynlong mynta u bnai.
Ha ka sien ba nyngkong ka Shillong, kan ïoh ban pynlong ïa ar tylli ki jingïalehkai International jong ki shynrang – kaba nyngkong ka dei ka jingïalehkai paralok hapdeng ka India bad ka Maldives ba la buh ban long ha ka 19 tarik u Lber bad kaba ar ka dei ka jingïalehkai AFC Asian Cup 2027 qualifier hapdeng ka India bad ka Bangladesh ha ka 25 tarik u Lber.
Dang shen ki la don ki jingpynbna ha ki khubor ha kaba ïadei bad ka jingïalehkai paralok la kan ïaid shakhmat ne em, hynrei, ha ka jingïakren bad ki lad pathai khubor mynta ka sngi, u General Secretary ka MFA u Bah Sunesh Syiem bad u Vice President ka MFA u Bah Cliff Nongrum ki la pynshai ba ka jingïalehkai kan long kumba la buh.
“Ngi la sngew kyndit bad sah lyngngoh haba Ngi ïohi ïa kum kane ka khubor namar na ka liang jong ka AIFF (All India Football Federation) kam shim la pyntip ne ong eiei ïa Ngi halor kane” la ong u Bah Sunesh Syiem. “Tang mynta ka sngi, Ngi dang ïoh pdiang ïa ka kyrwoh lyngba ka mail na ka AIFF ba pyntip ba ka la phah ruh ïa u Match Commissioner naka bynta kane ka jingïakhun hapdeng ka India bad ka Maldives ka ban wanpoi noh ar shuwa ka tarik ba la buh bad, Ho-oid, Ngin sa pynbit pynbiang ïa ki jaka sah na bynta jong ki.”
Lah ban kdew ba ka JN Stadium ka la ïoh ïa ka jingïaroh kaba khraw na u Match Commissioner jong ka AFC u Mindu Dorjee bad na u Assistant Coach jong ka kynhun phutbol shynrang jong ka Ri India u Mahesh Gawali, ha kaba u Mindu Dorjee u la pynpaw ïa kane ka madan kum “kawei na ki madan phutbol kaba biang tam” ha ka Ri.
Shuh shuh ki kam ki dang ïaid shakhmat ban pynbha ïa ka madan kilan met ha NEHU, khnang ba ki kynhun ki lah ban kilan met ha kane ka jaka, bad ba dang ap ïa kawei ka mashin ba kan wan poi naka bynta ban pynbeit ryntih ïa ka madan baroh kawei, la pyntip u Bah Cliff Nongrum.
U Bah Sunesh u la kam ba ka daw bah kaba la pynlong ïa ka AIFF ba kan tyrwa sha ka MFA ban pynlong ïa kine ki jingïakhun ka dei hadien ba ka la shem bad ïohi ïa ka jinglah jong ka jylla ban pynlong ïa ki kato katne ki jingïalehkai kiba dei jong ka lympung Durand Cup, nangta sa ka mynsiem ieit phutbol ki briew ka jylla bad ka jinglah na ka liang ka Sorkar ban pynbit pynbiang ïa baroh ki jingdonkam, ki long da shisha ki daw kiba pynshon jingmut ïa ka AIFF ban tyrwa sha ka MFA ba mynta ka kynti ban pynlong ïa kine ki artylli ki jingïakhun.
Lah ban kdew hangne, ka jingpyrshang jong ka Jylla ban khring ïa ki lympung ïalehkai phutbol ba heh ka la sdang katto katne snem mynshwa hadien ba ka Sorkar jylla ka la shim ïa ka rai ban pynkylla ïa ka madan phlang plastik (artificial turf) ha JN Stadium sha ka madan ba la siang phlang tynrai, ka jingdonkam ba kongsan na ka bynta ki jingïalehkai ISL bad bar ri. Ka jingpynthymmai kaba bñiah ïa ka madan ïalehkai, ka jingkyrshan ia ki hotel ba san khlur bad kiwei kiwei ki jingtei ruh ki la don la ka bynta ban khring ia kine ki jingialehkai sha Shillong.
Kyntang ïa wai, na ka liang bah Cliff bad bah Sunesh ki sngew ba ka jingïoh ban pynlong ïa kine ki artylli ki jingïakhun khlem pep kan ai mynsiem biang ïa ki samla ïalehkai ba dang khie dang san jong ka jylla.
“Ngi kwah ban pyntip hangne ba ka kynhun ïalehkai ka India kin wan ban kilan met kumba artaïew hangne ha nongbah, ha kaba Ngi kyrmen ba kane kan plie ïa katta ka lad ne ka kabu ksiar ïa ki samla ïalehkai phutbol jong Ngi kynthei bad shynrang ba kin ïoh ban ïa kynduh markhmat bad kiwei pat ki samla ïalehkai ba la mih na kiwei pat ki shlem ïalehkai kiba don ha ka ri” la bynrap u bah Sunesh.
