Shillong, Ïaïong, 09: Ryngkat ki ummat bad ki durkhmat ba sngewsih jong ki bahaïing hasem, ïa ka met ba dang sah jong u Bah Sumar Sing Sawian uba long u nongthohkhubor ba la rangbah bha bad uba long ruh ha kajuh ka por u nongthohkot uba la khladnoh ha ka sngi Thohdieng la thang donburom ha ka sngi U Blei ha Jaïaw Jingthangbriew, Shillong.
Shwa ban rah ïa ka met na ïing sah kaba don ha Umroi Laban Saro, Ri Bhoi District, ki kynhun bapher bapher ki la ïashim bynta ban leh burom khatduh ïa ka met ba dang sah jong u Bah Sumar uba long uwei na ki nongïalam bahakhmat jong ka Seng Khasi Kmie.
Ïa u Bah Sumar la kha ha ka 15 tarik, Jylliew 1941 bad u la khlad noh na kane ka sla pyrthei ha ka rta kaba 82 snem.
Kum u nongthohkhubor u Bah Sumar u la long u Editor jong ka kotkhubor Apphira bad u la noh synñiang shi katdei eh lyngba ki jingthoh jong u sha kiwei pat ki kotkhubor nalor ba u ju don bynta bad ka All India Radio, Shillong, ka Doodarshan Kendra, Shillong ha kaba ïadei bad ki kam pathai khubor.
Ka jingkhladnoh jong u Bah Sumar ka la long ka jingduh kaba khraw haduh katta katta ïa ka jaidbynriew namarba u dei uba briew uba tip thik pa thik ïa ki kyntien khasi paka bad uba ju thoh ruh shaphang ka jingriewspah jong ka kolshor tynrai u Hynñiew Trep Hynñiew Wasa.
Kum u nongthoh kot u la pynmih ïa ka kot kaba u la jer kyrteng, ‘Ki khun ki hajar na jingkieng Ksiar, Ka Jutang. U la pynkylla Khasi ruh ïa ka Gitanjali ba la thoh da u Rabindranath Tagore bad u la thoh bun tylli ki kot jingrwai poitri.
U la long u Chief of Bureau jong ka Shillong Press Trust of India (PTI) bad u la long u Khasi banyngkong eh ban bat ïa kane ka kyrdan.
Ha u snem 2017 ka Sorkar Jylla ka la ithuh kyrpang ïa ki kam kiba u Bah Sumar u la noh synñiang ha ka thoh ka tar Khasi da kaba pynkup burom da ka khusnam Tirot Sing Award ha sngi rakhe ïa ka Meghalaya Day.
U Bah Sumar u la ïoh pdiang ruh bun tylli ki khusnam ha ka kam thoh kotkhubor bad ha ki kam ka imlang ka sahlang.
U dei ruh uwei na ki nongmait lynti ban pynsdang ïa ka rongbiria da kaba pynlong ïa ka jingïakop siat khnam ïa kaba la ju pynlong da ka Apphira Archery Committee.
Nalor ka thoh ka tar, u Bah Sumar u la noh synñiang sha ka imlang ha kiba bun rukom bad u la long ruh u nongprat lynti da kaba thaw ïa ka komiti kumno ban shna ïa u durmot jong u Myllung SoSo Tham uba don mynta ha phyllaw jong ka State Central Library.
U dei u dkhot ba shitrhem jong ka Seng Khasi (Kmie) Mawkhar uba la bat kum u Secretary ba nyngkong jong u Lum Sohpet Bneng Committee bad uba la long uwei na ki nongïalam jong ka Seng Khasi (Kmie) ban ïalam ïa ka jingkiew sha u Lum Sohpet Bneng ïa kaba la tip kum ka ‘Kiew Pyneh Rngiew.’
